«Слово» – Праздник Преображенія Ісуса Хріста – неділя, 9.00 год.

Пережываме далшый великый і прекрасный із праздників – праздник Преображенія. Ісус Хрістос взяв зо собов трьох своїх учеників – Петра, Якова і Йоана на высоку гору, на гору Тавор, де ся перед нима переобразив, то є, змінив свою подобу.

Його тварь засвітила як сонце, а облечіня побілило як сніг. Ісус тов подійов указав частку свойой славы ученикам, жебы дати їм підкріпліня, коли го увидять в іншій славі, то в славі креста. Коли буде збичованый, оплюваный, роспятый і похованый. Жебы сі втогды усвідомили, же Він тото вшытко прияв добровольно про спасіня людей. Жебы втогды не ослабла їх віра. За свідків Ісус бере двох представителів Старого завіта: Мойсея і Ілію. Мойсея, котрый репрезентує закон, і Ілію, котрый репрезентує пророків. Тым Ісус указує, же є наповніня закона і пророків. Же не є Божый противник, але справды Божый Сын. І Сам Отець засвідчує Його божество, словами: Тото є мій прелюбый Сын, Його слухайте.

Ісус тов подійов указав великость і славу першосотвореного чоловіка, якым быв чоловік при сотворіню, і што зробив гріх із чоловіком. Але тыж хотів і указати, якый буде чоловік при обновліню, при його другім приході. Євангеліє нам говорить: І втогды справедливы засвітять як сонце у славі свойого Отця. Ісус і нас кличе до той славы, котру указав часточно на горі Тавор. Прото не падайме на дусі, коли нас стрічають вшелиякы тажкы сітуації: ці то суть різны проблемы, тяжккости, хвороты, або тыж атакы духа того світа, ці нашых страстей. Коли ся нам видить, же наша сітуація є уж безвыходнов. Посмотьме втогды на гору Тавор і божый покій наповнить нашу душу. Слава Ісусу Хрісту!

В неділю, 25 авґуста 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 25 авґуста о 15.00 і 26 авґуста о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА