«Слово» – Праздник Богоявленія – неділя, 9.00 год.

Затихли співы ангелів над Віфлеємом, пищалкы пастырів і розрух із приходу волхвів. Перешло тридцять років. А над Йордан звучіть голос Йоана, котрый кличе ку покаяню, а тых, котры приходять ку ньому, як знак покаяня крестить.

Головным в його проповіді є оголошаня Того, котрый іде за Ним, а котрому недостойный розвязати ани ремінці на сандалах. А коли єдного дня так вовышено бісідовав о приході Спасителя і Його великій моци і славі, сам Ісус никым непознатый, стоїть меджі народом чекаючім на крещіня. Йоан, повный Святого Духга, такой Його спознав, і сперать ся тому, жебы Його покрестив.

Говорить: Я ся мам дати Тобі покрестити, а Ты приходиш ку мі. Йоан не розумить тому ділу Ісуса. Но Ісус йому повів: Охаб так, теперь. Іншыма словами. Теперь не є час на высокы бісіды о мойїм божестві і моїй моци, о моїм суді над людми. Я теперь ту, жебы выконати волю Отця – спасіня людей. Ты теперь не розуміш, што я роблю. Бо твоє думаня, не є моїм. Ты не розуміш моїм дорогам, котры суть незвычайны про чоловіка. Но роб лем єдно: віров вшытко приймий і повинуй ся мойому рішіню і моїй волі. Тогды Йоан Його покрестив.

А як Ісус вышов із воды, такой отворили ся Йому небеса, Святый Дух сходить в подобі голуба на Нього а з неба звучить голос Отця: Тото є мій прелюбый Сын, в котрім є моє залюбліня. Бог над Йорданом выявлять таїнство, же є Триєдиный. Єден Бог в трьох особах. Отець давать ся познати через голос, Сын, котрый є крещеный а Святый Дух сходить в подобі голуба. Першый дар, котрый нам Бог давать в днешнім празднику Богоявленія є появліня ся Святой Тройці над Йорданом.

В Празднику Рождества лем ангелы оголошають велику радость із приходу Спасителя. Ту сам Отець выдавать свідчіня о своїм Сынови а Святый Дух в подобі голуба потверджує правдивость слов Отця.

Чом праві в подобі голуба сходить Святый Дух? Жебы указати на Хріста, як на примірителя чоловіка з Богом. Коли в часі потопы за Ноя голуб приношать в пыску зелену голузку Нойови, тым назначує, же зачінать новый жывот. Потопов быв потопленый гріх а людство мать нову принагоду ку новому жывоту. Так і теперь Святый Дух сходячі на Хріста в подобі голуба указує, же приходом Хріста зачінать новый жывот. Отворило ся небо – небо, котре было через непослух прародічів заперте про людство, теперь отворять ся.

Є отворене Хрістови, а через Нього нам вшыткым. Хрістос нам подаровав дар святого крещіня, де зануріньом наставать то, што стало ся при потопі світа. Коли быв потопленый гріх, котрый пановав над людством. Хрістос пришов зничіти, потопити гріх свойов смертьов і воскресіньом. А і мы в крещіню сьме потоплены до смерти Хрістовой, жебы умер у воді гріх і мы зачали вєдно з Хрістом новый жывот.

Над Ісусом зазвучав голос – тото є мій прелюбый Сын – тоты слова суть адресованы і нам. І мы сьме были крещіньом зачленены до Божой родины. В тобі мам залюбліня (ґр. Евдокія – добре думаня). Бог мать о нас лем добре думаня. Думаня любви – бо належыме до Божой родины. Далшый дар, котрый нам быв дарованый крещіньом Ісуса в Йордані.

Дорогы радіослухачі, пережываме тот радостный світлійшый од Рождества праздник Богоявленія. Дякуйме Господу нашому Ісусу Хрісту за Його любов. За Його великы дары, котры нам своїм приходом на Йордан даровав. Бо Він вшытко робить про нас, про наше спасіня, про наше вічне щастя в небі. Правда, коли мы приймеме тото закликаня. Хрістос крещаєт ся!

В неділю, 19. януара 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. януара 2025 р. о 12.00 год. і 20. януара 2025 р. о 2.00 год. за русиньскым часом.