«Слово» – Праздник Богоявленія – неділя, 9.00 год

По Рождестві Ісуса Хріста є другым великым праздником нашого церьковного рока, а іщі славнішым і яснішым, праздник Богоявленія. В рождестві Бог указує звізду мудерцям, а ангелы ся появляють пастырям. При тім празднику появлять ся над Йорданом ціла свята Тройця: Отець, Сын і Святый Дух.

Йоан Креститель проповідав крещіня покаяня, жебы люде приходили і признавали ся у своїх гріхах. Многы так робили щіро. Тым Йоан довольовав зыйти до воды і крестити ся.

Но, котры приходили нещіро, облестно, тым грозив: Поколіня гадяче, хто вас научав, як уникнути Божому гніву. Приношайте плоды достойны покаяня. А о Хрістови, котрый іде по нім, учів: По мі приходить міцнішый од мене, котрому я недостойный розвязати ремінці на його сандалах.

А тогды пришов і Ісус із Ґалілеї, жебы ся дав покрестити. Йоан ся всперать тому: Я ся мам дати тобі покрестити, а ты приходиш ку мі? Йоан не розуміє. Но Ісус му говорить: Не бій ся, лем зроб так. Зохаб так теперь. Зохаб теперь высокы бісіды о мі. Теперь на то не є час. Буде і то, але теперь зохаб і доволь ся мі покрестити. А Йоан дозволив.

І такой Ісус вышов із воды. Отворили ся му небеса, Святый Дух зышов в подобі голуба а Отець з неба свідчіть: Тото є мій любый Сын, в котрім я мам залюбліня.

Коли Йоан послухнув, быв свідком появліня цілой Святой Тройці. Ісус не потребовав крещіня, але нам давать дар. Посвятив воды, давать нам дар крещіня. І мы посячуєме йорданьску воду, береме до своїх домовів, чекаме священика, жебы нам посвятив обыстя. Но і над нами зазвучав тот голос: Тото є моя люба дітина.

Днешній праздник нам припоминать тыж і тоту велику подію – нашого крещіня. Там нашы крестны родічі одрікали ся і обіцяли. І нам треба наново повісти Богу обіцянку вірности і соєдиненя з Хрістом а одрікнутя од сатана.

А нелем нашыма устами выповісти слова, але і нашым жывотом. Жебы в часі нашого земного жывота міг звучати тот голос: Ты єсь моя люба дітина. А головно в часі нашого одходу із того світа. Хрістос раждається!

В неділю, 23. януара 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 23. януара о 12.00 год. і 24. януара о 2.00 год. за русиньскым часом.