«Слово» – Праздник Богоявленія – неділя, 9.00 год.

Дорогы радіослухачі, в літурґічных текстах предпразденства Богоявленія, чуєме: Світлый быв опередній праздник, но світлішый надходячій. Ясный быв опередній, но яснішый надходячій. Там ангел звістовав, ту сам Отець засвідчує і Йоан крестить.

Бо Йоан выступив в йорданьскій пустыні і проповідав крещіня покаяня. А кедь сі в духу думали, ці то не він є тот обіцяный Месія, Йоан говорив: Я вас крещу водов, но приходить, котрому я недостойный розвязати ремінці на його сандалах. Він буде крестити Святым Духом і огньом. А коли Йоан так говорив і сам Хрістос приходить із Ґалілеї, жебы дати ся покрестити, но Йоан не хоче і повість: Я мам дати ся Тобі крестити і ты приходиш ку мі? Но Ісус на то, охаб так теперь. Як бы повів: Ты проповідаш о мі высоко, но не бій ся і то буде. Але теперь про спасіня людьского роду є потрібне тото діло. І Йоан покорив ся і покрестив Ісуса. А Ісус такой вышов із воды, отворили ся небеса, Святый Дух в подобі голуба сходить на нього і із неба зазвучіть голос: Тото є мій любый Сын, в котрім я мам залюбліня. Так в празднику видиме появліня Святой Тройці. Отець через голос, Сын крещеный в Йордані і Святый Дух в подобі голуба. Видиме велику покору, понижіня Бога про спасіня чоловіка. Видиме ту і дар крещіня про нас.

Св. Василій говорить, же і над нами зазвучав тот самый голос при святім крещіню, хоць невидимым способом, як над Ісусом на Йордані. Стали сме ся крещіньом любыма Божыма дітми. Тото нас завязує, жебы жыти святым крещіньом, жебы тот голос зазвучав над нами по добрім завершіню нашого земного жывота в годині смерти: Тото є моя люба дітина в котрій я мам залюбліня.

В неділю,  20. януара 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 20. януара 15.00 о 20.00 год. і 21. януара о 2.00, год. за русиньскым часом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА