«Слово» – праздник Богоявленія – неділя, 9.00 год.

Пережываме праздник Богоявленія. Є То другый великый праздник нашого церьковного рока. Уж од предпразденства, такой по празднику св. Василія, нас Церьков приготовлять ку тому празднику, Указуючі на його великость: Тамтот [Рождествa] быв великым, славным, ясным, но тот [Богоявленія] є векшым, славнішым, яснішым.

Тамтот мав звізду, ангелів, маґів, пастырів. Тот зясь має Предтечу Йоана, Самого Отця, котрый засвідчує. Йоан выступив і проповідав при Йордані, жебы люди робили покаяня, кликав їх ку крещіню, сповідуючі притім свої гріхы. Говорив о величности того, котрый приходив по ним. Говорив о Ним як о тім, котрый крестить Святым Духом і огньом, маючі в руці лопату на очіщіня свойого боїска. Тым передназначовав владу судити. А єдного дня Ісус приходить із Ґалілеї, но приходить як звычайый чоловік, ставлять ся вєдно із іншыма терпезливо чекаючі аж на на нього прийде шор. Як Йоан Його збачів, говорить Йому: Я мам дати ся тобі покрестити а ты приходиш ку мі? Но Ісус одповідать: Зохаб так теперь. Іншыма словами: І тото буде, о чім єсь проповідав, о моїй владі, величности, славі. Но теперь іщі не є час. Теперь є час на інше. Про спасіня людей є потрібно выконати вшытку справедливость і прияти од тя крещіня. І Йоан покрестив, а Ісус такой вышов із воды, отворило ся небо, зазвучав голос Отця: Тото є мій прелюбый Сын, в котрім я мам залюбліня. Святый Дух сходить в подобі голуба над Ісуса.

Так ся в тім празднику появлять ціла Свята Тройця. Велике таїнство Тройці открывать ся. В часі Ноя при закінчіню потопы голуб звістує новый початок несучі зелену голозку, ту голуб не ненесе голузку, но указує на Хріста. Він є тым покойом. Він приходить на спасіня каждого, хто хоче. Поноріня а такой выноріня із воды указує на смерть і воскресіня. Указує і на наше крещіня, в котрім сьме были похованы із Хрістом, жебы із Ним воскреснути ку новому жывоту. І над нами зазвучав тот голос: Тото є моя прелюба дітина.

Прото жыйме тым новым жывотом, котрый сьме прияли при тайні крещіня, а выдайме о тім свідчіня тому світу, котрый так одходить ся од Бога, і чім дале глубше понарять ся до рабства гріху і смерти. Указуйме тому світу, же правдива радость і покій є лем в жывоті з Богом. Хрістос крещається!

В неділю, 21. януара 2018 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 21. януара о 15.00, 20.00 год. і 22. януара o 2.00 год. за русиньскым часом.

Фото: Крещіня Господне. Джотто, Жрідло: Wikipedia.