«Слово» – Неділя выгнаня Адама із рая – неділя, 9.00 год.

Послідньов недільов, котра нас приготовлять на вступ до Великого посту, є Неділя сыропустна.

Называть ся тыж Недільов выгнаня Адама із рая. В нашых Богослужінях той неділі часто стрічаме розповідь о выгнаню із рая. Адама, котрый сидить  і в слызах роздумує над своїм нещастьом. Як про єдну нарушену заповідь утратив вшытко: безсмертность, красоту рая, радость і блаженость, панованя над сотворіньом. А Спаситель одповідать Адамови: Не хочу дати погыбнути мойому сотворіню, лем быти спасеному і прийти до познаня правды, а хто ку мі приходить, не выжену вон.

Євангеліє днешньой неділі нам указує три области, в котрых є чоловік в рабстві. Ісус Хрістос нас позывать ку слободі. Наперед говорить о одпущіню. Гріх приніс розділіня, незлагоду, ненависть, злопамятность до людьского жывота. Бог приношать лік – одпущіня. Но не силує, але зохаблаять слободну волю: Кедь одпустите – і вам буде одпущено, кедь не одпустите – ани вы не набудете одпущіня. Неодпущіня є рабство, неслобода, в котрій діавол тримать чоловіка. Прийти ку познаню той правды веде ку слободі, котру давать Ісус своїм одпущіньом.

Дале нам Господь говорить о пості – средсвто так важне в духовнім жывоті, но і ту може быти чоловік в рабстві – коли ся постить про другых людей, жебы хвалили, указовали, якый то святый чоловік. Ту Ісус ясно говорить – уж мають свою одплату. Але нам давать раду: Кедь ся постиме, не указуйме то другым, але постьме ся перед Богом. Не обмеджуйме піст лем на їдло. Але тілесный піст най буде споєный з постом духовным. Лем втогды мать ціну перед Богом і веде ку слободі.

А третьов областьов на котру Ісус указує – привязаность ку матеріалному. Чоловік так забывать, же нагромаджованьом непотрібного богатства не продовжыть собі жывот. Але раз прийде момент, коли о вшытко прийде. А то і ту на землі – ці молі знищать, ці арджа, ці злодії вкрадуть. Або ай коли ні, так приходить смерть, а чоловік мусить зохабити вшытко. Але наоспак позывать нас зберати богаства в небі. Де нич такого не грозить, ани смерть нам то не може украсти. Якы суть тоты богаства: Любов, милосердя, добры діла, молитва.

Ісус Хрістос нам давать проґрам, як добрі і хосенно пережыти тоту благодатну добу Богом дарованого часу посту. Приймийме тото Боже позваня, жебы ся приготовити добрі не лем ку ті земній Пасхі, але і ку нашій вічній Пасхі. Слава Ісусу Хрісту!

В неділю, 1. марця 2020 р., о 9.00 год. проґрам «Слово», котрий реалізує єромонах Маркіян ЧСВВ. Повторіня 1. марця о 12.00 год. і 2. марця о 2.00 год. за русиньскым часом.

фото: Джованні ді Паоло, «Выгнаня з рая», Метрополітен Музей – wikimedia

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА