«Слово» – Неділя всіх святых – неділя, 9.00 год.

Днешня неділю ся называть недільов вшыткых святых. Є послідньов недільов в літурґічнім календарю, котров ся закінчує добу Квітной тріоди. В днешній день Церьков памятать на вшыткых тых, котры жыли на тім світі в згоді з Божов вольов, в любиі ку Богу і набыли блаженость.

В нашім літурґічнім календарю на каждый день маме даякого святого. Ці із пророків, апостолів, мучеників, преподобных. Но суть і святы, котры ся не находять в нашім календарю. Маме много преподобных, котры жыли в монашестві, о котрых нихто не знать. Но такым Церьков призначує суботу пред Сыропустнов недільов. Але є тыж і много такых, котры не зробили даякы великы діла, не стали ся славныма провідниками, чудотворцями, священиками ці монахами. Они вели скрытый жывот в родинах, совістно выконуючі свої ставовскы, родинны ці манжельскы обовязкы. О якых нихто не знать. А Церьков і на них памятать.

Но днешній день не є лем припамятаньом різных святых, але тыж вызвов і про нас. І мы маме стати святыма. Быти святым є обовязком каждого хрістіана. Ісус сам вызывав: Будьте досконалы, як є досконалый Ваш небесный Отець. Святость є ділом дії Святого Духа а нашов одповідьов на ню. То нас мать вести ку внутрішньому очіщованю од старого чоловіка нахыленого ку страстям, ку гріху, привязаности ку земному, а вести ку Хрістови, ку смілому голосіню ся ку ньому в каждій сітуації, ку жывоту в Божій пристутности, в любви ку Богу і ближньому. Тото може робити каждый, в каждій позіції, яку мать на тім світі. А так днешній день є про нас вызвов наслідовати приклады тых, котры набыли святость і мати намагу і нам быти святыма. Слава Ісусу Хрісту!

В неділю, 3. юна 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 3. юна о 15.00, 20.00 год. і 4. юна о 2.00, год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: «Собор всіх святых», Греція, бл. 1700. Монастырь Пантократор на Афоні