«Слово» – Неділя вшыткых святых – неділя, 9.00 год.

Неділю по празднику Сошествія Святого Духа празднуєме як Неділю вшыткых святых. Кедь чуєме о святых, представиме собі святых мучеників, преподобных, ісповідників.

Мученикы, котры так героїчно вытримали у вірі, наперек різным мукам, переслідованям за імя Господа. Ці преподобны, жыючі на пустынях, в горах, яскынях ці в монастырях. Або тыж ісповідникы – тоты терпіли мукы за Хріста, але не вмерли такой, но перенесли мукы, зістали іщі жыти, а так выдавали свідчіня о своїй вірі.

А кедьже маєме велике множество святых по різных церьквах по цілім світі, а і так не мож пояти вшыткых, бо є много безіменных святых, о котрых не знаме, але не суть забыты у Бога, Церьков установила общій праздник, жебы оддавати честь вшыткым святым, котры находять ся в небеснім Царьстві.

Але днешня неділя нам говорить і о тім, же святость не є лем про дакотрых, але є про каждого хрістіана. Каждый хрістіан мать прямовати ку святости. А в чім є святость?

Не є у творіню чудесных діл, бо Ісус говорить о дакотрых: В тодень мі многы повідять Господи, Господи, ці мы в твоїм імені не творили чудесны діла? Ниґда єм вас не познав.

Святость є в слові – Боговидіня. Як уж пророк Давід говорить в 15-ім псалмі: Все єм видів Господа передомнов, жебы ся не заколысати. Смотрити внутрішнім поглядом на Хріста, принимати його слово, його любов, оддзеркадльовати Божу любов а передавати єй другым. Дати ся наповнити Хрістовов любвов і тоту любов давати нашым ближнім. Так наповниме головну заповідь: Будеш любити Господа Бога… а свого ближнього як самого себе.

А ту є важне рішіня нашой слободной волі. Доволити Святому Духу, жебы нас просвітив своїм світлом. Жебы сьме доволили Божій любви проникнути до нашого сердця і творили діла любви, маючі все Господа Ісуса Хріста перед своїма очами. Так будеме і мы поступати ку святости. Слава Ісусу Хрісту!

В неділю, 19. юна 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. юна о 12.00 год. і 20nedila. юна о 2.00 год. за русиньскым часом.