«Слово» – Неділя Томина – неділя, 9.00 год

Неділя апостола Томы, або Неділя антіпасхы, або Неділя обновліня. Такы назвы мать днешня неділя по празднику Пасхы. Ісус вечур по своїм воскресіню пришов через заперты двері ку своїм ученикам.

Пришов, жебы розогнати бурю похыбностей із їх сердця. Ученикы од рана чують од жен, же Ісус воскрес. Але они не увірили тій новині. Ісус приходить сам а говорить їм: Мір вам. Най ся утішыть ваше сердце. Єм то я. Подьте ся пересвідчіти, тадь дух не мать кости а тіло, а я, як можете видіти, предці мам.

Ученикы ся зрадовали, коли виділи Господа. Но Тома, єден із них, не быв там. Коли йому говрять тоты радостны слова, він вшыткых схолодив. Покы я ся не пересвідчу, не увірю. Мушу дати свій палець до ран од клинців, руку вложыти до його ребра. Так буду знати, же то справды Він.

Цілый тыждень была в його душі темнота, а може і у другых апостолів, коли Тома заніс меджі них атмосферу невірства. Прото Ісус знова пришов тым самым способом на восьмый день. А обертать сю ку Томови: Подь, влож і будь віруючім, а не невіруючім. Тома уж увірив і повів: Господь мій і Бог мій. А Ісус йому одповів: Добрі, знам, же теперь уж віриш. Уж буря похыбностей є розогнана, але блажены суть тоты, котры не виділи а увірили.

А так Бог доволює тото невірство часне апостола Томы, жебы підкріпити і нашу віру. Мы сьме тілесныма очіма не виділи Господа. Але можеме Його видіти очами віры. Можеме ся Го дотулити і нашыма устами і Його сожывати в Пресвятій Євхарістії. Але знова є потрібна жыва віра, же справды є ту Сам тот воскресшый Господь, котрый колись обертать ся ку Томови: блажены не видівшы, котры увірили.

Тота неділя є названа і Недільов антіпасхы – проти пасхы, через невісртво Томы. Но є тыж і Недільов обновліня через появліня Господа а обновліня віры в Томови. Най буде і про нас через апостола Тому обновліньом і посилніньом нашой віры во Воскресшого Господа. Жебы блаженство Господа, блажены, котры не виділи а увірили, платило і о нас. Хрістос воскрес!

В неділю, 1. мая 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 1. мая о 12.00 год. і 2. мая о 2.00 год. за русиньскым часом.