«Слово» – Неділя Томина – неділя, 9.00 год

Неділя по Неділі Пасхы называть ся Неділя Томина. Ісус Хрістос такой вечур по своїм воскресіню приходить ку ученикам через заперты двері. Они были замкнуты зо страху перед Жыдами.

Ісус приходить і подавать їм покій. Говорить їм: Посмотьте на мої рукы і ногы. Я єм то, не бійте ся. Давать їм міць одпущати гріхы. Но єден із апостолів, Тома, не быв там. А так не увірив апостолам. Але давать условія: Кедь не дам свій палець до ран од клинців, а не вложу свою руку до його ребра, не буду вірити.

О вісем днів были ученикы знова вєдно, але быв там і Тома. Ісус приходить так само через заперты двері. Подавать покій і обертать ся ку Томови: Подь а дай свій палець і влож свою року — а не будь невіруючій, але віруючій. Тома на то увірив і закричав: Господь мій і Бог мій! Ісус потверджує віру Томы: Ты єсь увірив, бо-сь ня видів, блажены, котры не виділи а увірили.

Днешня неділя указує нам темноту невіры і любов Хріста, котрый іде на условія ученика, лем жебы го привести ку вірі. Ісус допущать тоту невіру Томы, жебы указати своє божество. Приходить через заперты двері, говорить Томовы слова, котры Тома высловив перед апостолами, тым указує, же невидимо быв там. Жебы через невірство а потім доказ через дотуліня Томы увірили многы. Жебы не мали выгварькы. Тадь апостолы, могли сі думати, же видять Господа, были на нього навязаны. Або могли видіти духа. Ісус одстранює такы выгварькы. Давать і нам принагоду набыти блаженство: Блажены, котры не виділи а увірили.

Тома называть Ісуса Господь мій і Бог мій. То є особне одношіня ку Хрістови. Він хоче быти і моїм Богом, моїм Спасительом і Господом. Най і тото невірство а потім віра Томы утвердить і нашу віру у воскресіня Господа. Хрістос воскрес!

В неділю, 9. мая 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. мая о 12.00 год. і 10. мая о 2.00 год. за русиньскым часом.