«Слово» – Неділя Томина – неділя, 9.00 год.

Днешня неділя мать веце названь. Называть ся Недільов Антіпасхы, Недільов Томинов або і Недільов обновліня.

Недільов антіпасхы – якбы проти пасхы, попертя Пасхы. А то через то, же кедь Ісус пришов на першый вечур ку своїм ученикам через заперты двері. Тома не быв там. І хоче доказ – кедь не дам свій палець до ран од клинців і свою руку до його ребра, не буду тому вірити. А Неділя обновліня, бо Ісус о вісем днів знова такым самым способом приходить. Позывать Тому, жебы ся дотулити руками, жебы ся їмити його ребра а так увірити в його воскресіня.

Так Ісус своїм приходом і доволіньом обновлять віру у воскресіня. А тым, же допущать тото невірство Томы, тота неділя нам приношать хосен. Бо як Тома ся пересвідчів, скрикнув: Ты мій Господь і Бог. А Ісус потвердив тоту віру: Ты єсь увірив зато, бо єсь ня видів, но блажены, котры не виділи а увірили.

А тото блаженство може односити ся і ку нам. Мы не можеме ся пересвідчіти нашыма очами або руками так, як то зробив Тома. Але праві через свідчіня Томы, котрый свідчіть вшыткым поколіням о правдивости воскресіня, можеме і мы утвердити нашу віру.

А далшый момент, котрый ту Ісус Хрістос указує, же приходить на восьмый день. Тым хоче назначіти початок того нового восьмого дня, котрый не буде мати вечора. Котрый настане при другім приході Господа, коли закінчіть ся тот семый вік – дочасный і земный а настане вічный.

А мы можеме жыти уж теперь тот восмый день духовно в обновліню жывота, в напряміню нашого жывота ку вічности. Без страху, без похыбованя, утверджены віров у воскресшого Господа Ісуса через апостола Тому. Він свідчіть вшыткым: Господь воскрес, він є мій Господь і Бог. Хрістос воскрес!

В неділю, 26. апріля 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. апріля о 12.00 год. і 27. апріля о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА