«Слово» – Неділя сыропустна – неділя, 9.00 год.

Сьме на порозі перед вступом до святого часу Великого посту. Днешня неділя называть ся Недільов сыропустнов, бо пущало ся їджіня набілу – сыра, молока, яєц… а тыж Недільов прощальнов або одпущіня.

Подля днешнього слова Євангелія, котре зачінать якраз словом о потребі одпущаня. Ісус Хрістос нам як і вчера і днесь хоче у своїй любви подати інштрукції, як добрі пережыти тот святый час на хосен нашой безсмертзной душы, і хосен нашых ближніх.

Вчера то было слово: Мерькуйте на тщеславіє – порожню славу. То є, мерьковати на то, жебы свої діла посту, молитвы, милостыні, не робити лем про людьске око, жебы нас виділи. Бо то, же кажде діло не можеме сховати перед людми, жебы нас нихто не видів, то ся цалком не дасть. Але Господь не на тото напоминать, але жебы не робити з наміріньом, жебы ня люде виділи.

Значіть, коли не видять, тогды уж не мам охоту до молитвы, посту ці іншых добрых діл. А небезпеченство того є велике – уж мають свою одміну. Бо хоць як много бы сьме назберали духовных плодів в часі посту, то тщеславіє – порожня слава, тото прягнутя залюбити ся людям, вшытко роздує, подобно як вітор земный порох.

А днешнє слово нам дає другу інштрукцію – одпущіня. Господь говорить ясно. Одпустите людям, і вам будуть одпущены вашы гріхы. Кедь не одпустите, ани вам не будуть одпущены вашы гріхы.

Але Господь вымагать од нас нелем поверьхнє одпущіня на словах, але глубоке од сердця. А то не є так легко. Бо часто чуєме слова: Одпущу, але не забуду. Но то не є одпущіня. А в молитві Отче наш є то высловлене іщі грозніше. Може быти про нас тото слово радостьов, надійов, але тыж і проклятьом.

Одпусть нам Боже так, як і мы одпущаме. То є, Боже, до той міры мі одпусть, як і я одпущам своїм довжникам, ображателям ці кривдителям. Або, Боже, так мі не одпусть, бо ани я не хочу одпустити. А подобно як тщеславіє і не одпущіня, руйнує вшытко набыте в духовнім жывоті.

Ай кебы сьме перетерпіли і мукы за Хріста, але не одпустили од седця, не буде нам ниякого хосну. Прото нас днешній наш Господь у своїй любви запрошать: мерьковати на тщеславіє, жебы не робити свої діла посту перед людми; а тыж, жебы сьме до того часу вступили з одпущіньом нашым ближнім. Слава Ісусу Хрісту!

В неділю, 17. марца 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. марца 2024 р. о 12.00 год. і 18. марца 2024 р. о 2.00 год. за русиньскым часом.