«Слово» – Неділя сыропустна – неділя, 9.00 год.

Неділя сыропустна або неділя одпущіня – суть дві назвы послідньой неділі перед вступом до Святой штиридцятніці. Тов недільов ся переставало їсти вшытко, што є зо звірят: сыр, молоко, яйця. Зато ся называть сыропустна.

А неділя одпущіня – бо праві тым зачінать днешнє слово євангелія. Кедь вы не одпустите людям їх довгы, ани вам ваш Отець Небесный не одпустить вашы гріхы.

Ісус Хрістос нам як чоловіколюбный хоче подати добры рады, жебы сьме хосенно пережыли тот Богом дарованиый час посту. На першім місці ставить потребу не мати зла, ненависти, злопамятности, гніву у своїм сердці. Молитва Отче наш, котру ся молиме так часто в нашых богослужінях ці пріватных молитвах, нам указує на тото условія. Де тота молитва може быти про нас благословліньом або проклятьом: І одусть нам так, як і мы одпущаме.

Другов радов котру нам давать днешнє слово є правдивый піст. Постити не про людьске око ці людьску похвалу. Але постити про Бога а свою безсмертну душу. Ісус ту не неґує потребу посту, але указує на наміріня. Не вонкашнім взглядом давай знати о пості. Умый собі тварь а помаж голову. Жебы не люде виділи, же постиш, але твій Отець, котрый видить затаєне а одплатить тобі явно.

Святый Василій у своїм слові говорить о потребі посту од їдла. Хто сі думать, же йому выстарчіть постити од гріха, од злых діл, але не буде овладати свій жалудок, того намаганя є даремне.

А третє слово, котре нам Господь давать є – піст, як принагода здобыти слободу од привязаности ку матеріалному. Не згромаджуйте собі богатства на землі, де їх міль, гырджа ничіть, де ся підкопують злодії і крадуть. Але в небі. Там, де є твоє богатство, там буде і твоє сердце.

Тот світ, або діавол через духа того світа хоче чоловіка тримати в рабстві жадобности, нестриманости, намаганю мати все веце і веце. Выхоснує на то розмаїты средства. Через різны рекламы гучіть нам до головы – тото мусиш мати. А так не доволює ся заставити в тім наганяню за добрами того світа.

А тото слово нам говорить: хочеш зберати? Зберай про небо, не про землю. Бо яй кебы ниякый злодій не украв, предці смерть вшытко украде. А так приймиме тоты рады нашого Спасителя, жебы сьме з Його помочов добрі выхосновали тот час на хосен нашой безсмертной душі. Слава Ісусу Хрісту!

В неділю, 26. фебруара 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. фебруара 2023 р. о 12.00 год. і 27. фебруара 2023 р. о 2.00 год. за русиньскым часом.