«Слово» – Неділя сыропустна – неділя, 9.00 год.

Неділя сыропустна, называть ся і недільов прощалнов – одпущіня, або і споминов на выгнаня із рая. Вшыткы тоты думкы нам Свята Церьков ставить перед очі той неділі. Сыропустна – пущало ся їджіня сыра, молока, яєць.

Літурґічны книгы нам припоминають подію выгнаня із рая. Як Адам сидить коло рая, смотрить на його красоту а усвідомлять собі, же уж є на другій стороні. Іщі перед хвільков быв жытельом рая, так мало , так мало, така нерозумность послухати пораду злого духа. Адам не знав, што буде далше, но мав надію, зазвучала в словах о приході Спасителя.

Но хто раз учує слова – ідьте од мене прокляты до вічного огня, уж не буде мати надії, уж ся то не буде дати змінити. Буде смотрити на выбраных, з яков радостьов одходять до вічного щастя, вічной радости, вічного покоя неба а він мусить одыйти до вічных мук. Якый смуток, якый жаль, яка безнадій, буде про такого.

Но мы маме іщі час, іщі сьме на тій землі. Ту платить Боже милосердя а його слова – не хочу смерти грішника, але його спасіня.

Днешній день перед вступом до Великого посту нам Господь наш подавать спасительны порады, як уникнути тому вічному плачу а єдночасно добрі пережыти тот спасительный час. На перше місце Одпущіня – кедь вы одпустите людям, і Отець ваш небесный одпустить вам. Але тыж і слова: кедь вы не одпустите ани вам не буде одпущено. Якы курты слова, але як важны условія про цілу вічность. Мы в часі посту молиме ся, робиме покаяня, выпрошаме милосердя у Господа. Але є ту условіє. Кедь хочеме прияти одпущіня, мусиме ай мы одпущати каждому. Любити і своїх неприятелів і молити ся за них. Кедь мать чоловік в собі гнів, злопамятность, они помаленькы якбы з’їдають його душу. Прото є потребне постити, шмарити тото од себе гет. Бо через то діавол мать у нас свою частку. Тогды і наше сердце є ку тому привязане.

Кедь пустиме тото зло од себе, одшмариме, тогды можеме і мы зо смілостьов просити у Бога милосердя за нашы гріхы. Слава Ісусу Хрісту!

В неділю, 6. марца 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 6. марца о 12.00 год. і 7. марца о 2.00 год. за русиньскым часом.