«Слово» – Неділя сыропустна – неділя, 9.00 год.

Послідня неділя приготовляюча нас на Святу Штиридсятніцю є сыропустна неділя. В днешнім євангелію нам Ісус Хрістос подавать дакілько дуже цінных порад як добрі пережыти святый час посту.

Наперед говорить о потребі одпущіня і кладе условія – як вы одпустите, і вам Отець небесный одпустить, а як вы не одпустите, ани вам не буде одпущено. Далше говорить о правдивім пості, не про людьске око, не быти засмучены хмуравы, але помазати голову і обмыти тварь. Тоты слова отцьове церькви пояснюють в духовнім значіню. Помазаня Святым Духом абы заперти двері внутрішнім страстям – злым думкам, фантазіям, гніву, злопамятности – і вшыткым внутрішнім гріхам, котры ся односять ку душі. І обмыти тварь – образ тіла – мерьковати на око перед блудным поглядом, ухо перед нехосенныма слухами, чух перед ароматами того світа одурачуючіма душу, рукы перед творіньом зла ногы перед ходжіньом по кривых дорогах. Ісус Хрістос сам давать приклад яков міцьнов збройов є правдивый піст – то є внутрішній і вонкашній. Давать нам силу перемагати чревоугодіє – нескротность пожаданя жалудка, сребролюбіє – жадость по матеріалнім земнім а славолюбіє – желаня лудьской славы а робити про людьске око. Старайме ся прияти тото позваня на хосен нашой бессмертной душі а выхоснуйме добрі тот святый час Святого посту, котрый тепррь зачінаме.

В неділю, 13. марця 2016 р., о 9.00 год. проґрам «Слово», котрий реалізує єромонах Маркіян ЧСВВ. Повторіня 13. марця о 12.00, 15.00, 20.00 год. і 14. марця о 2.00, 8.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА