«Слово» – Неділя святыx Oтців – неділя, 9.00 год.

Євангеліє Неділі святых Отців нам указує на довгый список імен. А мы сі кладеме вопрос: Чом нам Свята Церьков давать чітати тоты імена?

Дакотры і познаме, но дакотры суть нам цалком незнамы. Але в Божім слові нич не є лем так. Уж на початку видиме, же напаеред є поставленый Давід, а аж потім Авраам. Хоць Аврааам жыв далеко перед Давідом. Але кедьже обіцянка приходу Месії односила ся ку царьови Давідови, Жыде ся часто одлкликовали на нього. Прото Євангеліста Мафтей його ставить перед Авраамом, жебы указати, же Месія Хрістос прийде з роду Давіда.

Потім ся вертать ку Авраамові, Ісакови і Яковови і продовжать список імен. Так меджі нима видиме тых, котры одповіли на Боже запрошіня жыти подля Божых заповідей.

Видиме там і тых, котры робили наопак. Тыж видиме у єдных і тых самых і паджіня, і повстаня з гріха (як было і у царя Давіда). Тыж находиме там блудницю Рахаву, або чуджінку Рут. Тым нам Боже слово указує, же Хрістос не брыдить зараховати ся до історїї людьского роду. А тыж указати, же спасіня є про вшыткых людей.

Жыде очековали Месію лем про выбраный народ. На іншы поганьскы народы смотрили погордливо із верьху. Ісус тым, же доволює до свого родослову зараховати і Рут, котра не належала ку выбраному народу, хоче указати, же Бог приходить про спасіня каждого чоловіка. Ці є чуджінцьом або великым грішником. Каждого запрошать до свого царьства.

Од нас очекує одповідь приятя. Бог хоче прийти і народити ся і в нашім сердці. Хоче, жебы наше празднованя Рождества не было лем в опарадженых обыстях або дарунках, або може лем в співі колядок. Но хоче жебы было в отворіню і очіщіню свойого сердця, котре мать ся стати жывым Віфлеємом.

Указуючі на історію людького гріха і слабости, давать нам посилу, жебы нихто не падав на дусі. Божа любов перевышує каждый наш гріх, ці страсть або слабость. Слава Ісусу Хрісту!

В неділю, 2. януара 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 2. януара о 12.00 год. і 3. януара о 2.00 год. за русиньскым часом.