«Слово» – Неділя святых жен міроносиць – неділя, 9.00 год.

Пережываме радостный час Пасхы, в котрім звучіть в нашых богослужінях і при нашых поздравканях тото радостне: Хрістос воскрес!

Днешня неділя называть ся Недільов святых жен міроносиць. Чом называють ся міроносиці? Треба нам посмотрити дакус дозаду. Коли Ісус Хрістос проповідав Євангеліє, переходив із Ґалілеї до Юдеї і назад. Допроводили Його дванядцять апостолів, котры были найблизше коло Ісуса. Но тыж там были і жены, котры Йому служыли в звычайных потребах. Они не были десь впереді, але ходили за ним взаду.

То указує, же і в Церькви маме різны служіня. Єдны суть впереді, де їх видно. Другы цалком взаду, тото їх служіня не є видно. Але то не значіть, же є менше цінне. Бог не смотрить на то, ці є хтось впереді або взаду. Але з якым наставліньом свойой душы Йому служыть. Кілько любви ку Богу і ближньому давать в тім служіню.

То, з яков щіров любвов тоты жены служыли, видно під крестом. Кедь апостолы ся порозутікали, они зістали там. А коли положыли до гроба тіло Ісуса, они смотрять здалека, де його положыли, жебы ішли а помазали Його тіло, як закончіть ся день Суботнього параздника.

А так накупують ароматічны масти, а скоро рано ідуть ку гробу. Роздумують о великости каміня, ідуть із слызами. А то іщі не знають о варті од Пілата, котру собі архієреї выпросили вартовати при гробі. Но коли пришли, нашли камінь одваленый. Ангел їм звістує: Хрістос розпятый жыє, не є ту, ту є місце, де його положыли. Ідьте то повісти ученикам і Петрови.

Они находять ся якбы без себе з того появліня небесного жытеля. Тримаючі іщі міро в руках, уж го одкладають, уж не є потрібне. Уж суть самы помазаны правдивым Мором – Хрістом, котрого радостну новину о воскресіню несуть апостолам.

Яка переміна настала в їх сердці! Іщі перед хвільов наповнены жальом над смертьов улюбленого Учітеля. Теперь наповнены радостьов над словами ангела – Хрістос жыє. Тото посолство несуть апостолам, а звучіть і про нас. Коли сме наповнены жальом, болістьов, безнадійов в даякых сітуаціях жывота. Нараз ту звучіть: Хрістос воскрес! Вшытко наберать новый смысл.

Коли сьме притиснуты гріхом, страстями, пожадливостями, звучіть ту радостне: Гріх є переможеный, смерть є зничена, бо Хрістос воскрес!

В неділю, 19. мая 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. мая 2024 р. о 12.00 год. і 20. мая 2024 р. о 2.00 год. за русиньскым часом.