«Слово» – Неділя святых жен міроносиць – неділя, 9.00 год.

Попразденство праздника Пасхы тырвать штиридцять днів. Кажда неділя в тім часі перед нас ставить важны моменты Воскресіня. Днешна неділя міроносиць нам говорить наперед о похованю тіла Хрістового до гроба Йосифом Аріматейскым.

Він ішов сміло перед Пілата а просив Ісусве тіло. Пілат по потверджіню смерти стотником йому дав тіло Господа. Такым способом сам Пілат потвердив, же Ісус справды умер. Жебы раз дахто не повів, тадь він лем наоко умер, але ся пробудив у гробі. Євангеліє, котре є словом Божым, думать на найменшы детаілы.

Дале нам говорить о женах, котры скоро рано ідуть ку гробу. Роздумують по дорозі о Ісусові, заливають ся слызами. Глядають го як мертвого. Мають низке розуміня, але велику любов. Бісідують і о тім хто одвалить тот великый камінь. Но, як пришли увиділи камінь одваленый, вояків перестрашеных. А ангелів, котры звістують: Вы ся не бійте! Глядате роспятого Ісуса, не є ту, воскрес. Ідьте звістуйте його ученикам. Воксрес із мертвых. Повіджте і Петрови.

А жены од великой радости і страху од неземной появы ангелів утікають. А сам Ісус ся їм появив а говорить їм, радуйте ся, однесте тоту радостну новину моїм братам, же я єм справды жывый.

Тоты слова суть адресованы і нам. Не бійте ся і радуйте ся. Уж не є місце страху. Бо Хрістос переміг смерть. Він є побідитель. Хоцьшто бы ся діло в нашім жывоті, є то лем до часу. Є Воскресіня. Тото давать нам надію. А наповнює наше сердце радостьов.

Жены прияли тоты слова, были їм послухняны а ішли звісотвати апостолам. І мы наслідуйме їх приклад, звістуйме нелем нашыма словами, але головно нашым жывотом тому світу правду о Воскресіню: Хрістос воскрес!

В неділю, 8. мая 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. мая о 12.00 год. і 9. мая о 2.00 год. за русиньскым часом.