«Слово» – Неділя святых Праотців – неділя, 9.00 год.

Дві неділі перед Хрістовым Рождеством звуть ся Неділя святых Праотців і Неділя святых Отців. Ай кедь ся многы імена в тых двох неділях прелинають, предці є меджі нима розділ.

Неділя Праотців указує нам на праведників Старого Завіта, котры жыли віров в обіцянку приходу Спасителя. Обіцянку, котра была дана уж в раю. Але они жыли нелем віров в обіцяного Спасителя, але і вірностьов Йому. А то в оточінях, котры не были легкыма.

Посмотьме лем на дакотры приклады тых правдників. Праведний Ной. Жыв в часі, о котрім Святе Писмо говорить, же было велике зопсутя на землі. Коли люде называли ся лем земльов, лем тілом. Як кебы цалком забыли на безсмертну душу. На Господа Бога. Жыли лем про жалудок а піджалудок. То є про їдло і тілесны роскошы. А Господь Говорить ку Нойови, жебы приготовив корабель, бо прийде потопа світа. А хоць нич не насвідчівоало тому, жебы дашто грозило, увірив Божому слову. Хоць йому ся высмівали його сучасникы. Тадь сто років ставляв корабель. Він вірив Богу.

Праведний Авраам. Господь йому говрить выйти зо свойой землі і іти до незнамого края. Він вірить Богу. І коли його чекали різны выпробованя його віры, він перебыв у вірі. І называме Авраама отцьом віры.

Троє младенців у Вавилоні. Поставлены перед царя Набухонодосора, сміло йому одповідають. Бо він їм грозить, же коли не оддадуть честь златій скулптурі, котру царь поставив, будуть шмарены до огнянного пеца, но сміло одповідають: Знай царю, же наш Бог мать міць нас ослободити з твойой рукы і огняного пеца, но як кебы ні, то знай, же мы зістане вірны нашому Богу а твоїй златій скулптурі ся кланяти не будеме. А Господь їх прославив за їх вірность, были уратованы із огнянного пеца.

Пророк Даниїл, жыючі у Вавилоні, быв шмареный до ямы з левами, а то аж двараз за свою вірность Господу. Господь затыкав пыскы левам.

Тоты праведникы жыли віров і вірностьов Господу. Од нас ся выжадує векша віра: Віра, же Господь уж пришов, народив ся, дав нам спасительны наукы, терпів і воскрес, і возніс ся на небо, і прийде в славі судити жывых і мертвых. А сохранити і вірность в оточіню, котре не інше од того, в котрім жыли праведникы Старого Завіта. Оточіня, котре є неприятельскы наставлене ку Богу, Церькви. Коли быти вірныма Євангелію ся в днешній добі лібералізма не носить.

Святы праведникы не смотрили ани на оточіня, ани на высміваня, ани на согласность тых, котры были проти Божого слова. Смотрили лем на то, же Бог повів, так буде. Як то повів пророк Єремія. Блаженый чоловік, котрый ся надіє на Господа, проклятый, котрый ся надіє на чоловіка.

Просьме сятых Праотців, жебы сьме перебыли у жывій вірі і вірности нашому Спасительови Ісусови Хрістови. Слава Ісусу Хрісту!

В неділю, 29. децембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 29. децембра 2024 р. о 12.00 год. і 30. децембра 2024 р. о 2.00 год. за русиньскым часом.