«Слово» – Неділя святых Отців – неділя, 9.00 год.

Послідня неділя перед Рождеством ся называть Неділя святых Отців. Тота неділя є характерістічна тым, же ся чітать довгый список імен. Почінаючі од Авраама аж по Хріста. Якый хосен є про нас із тых імен?

Дакотры суть нам знамы, іншы лем подля мена, але ближе о них не знаме нич. Но інтересный є уж самый початок. Книга родства Ісуса Хріста, сына Давідового, сына Авраамового. Книга родства – говорить нам, же Бог вступує до людьской історіі, ся зачленює, приїмать людей за свої предків і вчленює до свойой родины.

В тім списку можеме найти людей повных віры як Авраам, котрый быв все приготовленый повнити волю Божу. Опустив свій край, бо Бог йому повів. Быв приготовленый пожертвовати і свого сына, коли Господь од нього пожадовав. Хоць насправды хотів Бог указати велику віру і послухняность Авраама.

Дале там чуєме о царьови Давідови, котрый од маленька быв вірный Господу Богу. Божов силов переміг Ґоліата – обра, котрый выступив проти нього, котрый быв побідительом у многых боях, бо Бог быв з ним. Но котрый із людьской слабости упав, коли ся засмотрив на жену свойого найліпшого воєводы. Послав го до боя, жебы умер. А так сі взяв його жену. Но Бог посилать пророка Натана, котрый напомянув Давіда, а Давід признавать свою вину і є му одпущено.

Дале там має і штири жены, котры суть выкреслены неґатівно. Чом холем єдна із них не є позітівна, але дві поганкы, єдна чуджоложніця з властным свекром а четеврта чуджоложніця із царьом. Но тоты особы суть там, жебы указати а заганьбити пыху Жыдів, а єдночасно указати, же Господь не ганьбить ся зачленти до предків, котры были грішниками. Тым указує нам, же і нас хоче зачленити до свойой родины, до свого родства. Не смотрячі на великость людьскых гріхів.

Каждый є покликаный. Нихто не є одверьгнутй, хто приходить щіро. Подьте ку мі вшыткы обтяжены.. а хто ку мі приходить, того я не одожену. Так Господь позыватх і нас. Теперь, перед святками Рождества: Прийдьте вшыткы, очістьте ся, выпсповідайте свої гріхы, дозвольте Богу зачленити ся до його родины.

Хрістос хоче каждого зачленити до свойой родины. Праві прото чітаме тот список, коли там видиме грішників. Господь їх прияв. Жебы сьме не впали на дусі. Господь прийме і нас. Слава Ісусу Хрісту!

В неділю, 31. децембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 31. децембра 2023 р. о 12.00 год. і 1. януара 2024 р. о 2.00 год. за русиньскым часом.