«Слово» – Неділя святых отців 1-го Нікейского собора – неділя, 9.00 год.

Днешню неділю празднуєме память святых отців 1-го Нікейского собора. Собор одбыв ся у 325-ім році в Нікеї недалеко Константінопола, жебы дати одповідь хрістіяньскому світу на блудну науку аріанізму, котра атаковала хрістіянство в його центрі.

Основоположником того блуду быв Арій, котрый зачав проповідати проти божества Ісуса Хрісту. Не признав Хріста як єдного із Тройці, але лем як доконале сотворіня.

Святы Отцьове склали сімбол віры, котрый і мы молиме ся на каждій Службі Божій. В котрім чуєме слово – єдиносущна Отцу – гомоузіос – же Сын є єдной бытности із Отцьом. Ай кедь по соборі было іщі много прихыльників того блудного учіня, а то і імпереаторів, котры проляли много хрістіяньской кровли, но собор дав дезорьєнтованым хрістіянам ясный напрям.

Тото є посолство і про нас. І мы днесь находиме ся в тій мішанині різных наук, наглядів. А стоїть ворпос: де є правда? Повставають многы лібералны і теолоґове, священикы і епіскопы і голосять релатівізацію моралных прінціпів, Божых заповідей ці самого Божого слова. Де нам найти орьєнтацію?

Одповідь нам давать тот собор: в Хрістові. Тото, што Хрістос повів, тото є правда, ай кебы цілый світ говорив дашто інше. Маме стояти твердо у вірі. Най нам тото выпрошують святы отцьове Нікейского собора, котрых память днесь празднуєме. Слава Ісусу Хрісту!

В неділю, 31. мая 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 31. мая о 12.00 год. і 1. юна о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА