«Слово» – Неділя святых отців 1-го вселеньского собора в Нікеї – неділя, 9.00 год.

Ісус Хрістос по своїм воскресіню появляв ся многым даючі доказы того, же досправды воскрес! По 40 днів перебывав зо своїма учениками. На 40-ый день їх вывів на Оливну гору, жебы їм дав іщі послідні інштрукції і возніс ся до неба.

Говорив: Дана мі є вшытка влада на небі і на землі. Наповнять радостьов учеників, же могли быти участниками так великого таїнства спасіня людьского роду, а можуть тоту добру новину голосити по цілім світі. А додавать слова: Я з вами по вшытки дні аж до кінце світа. Хоць уж ня не увидите своїма тілесныма очіма, но Я буду з вами буду благословити ваше діло. Ученикы ся вернули наповнены радостьов до Єрусалима. Тот праздник і нас наповнять радостьов, і кідь може ся видить, же ніч ся не змінило, же зло далше якбы царьствовало, же неприятелі Хріста мають вшытко на ничіня Божого діла (медії, політічны власти…), но Тот, котрый повів: Я єм дорога, правда і жывот. Іду  но знова прийду і возьму вас ку собі, нам тыма словами указує же Йому єдиному буде належати посліднє слово.

Прото не падайме на дусі, кідь видиме зло коло себе, різны тяжкости, проблемы. Апостол Павел говорить, же теперь іщі не є видно, же му є вшытко покорене. Але раз при Його другім приході ся то стане явным каждому. Прото старайме ся лем о єдно: Быти все на стороні Хріста, выхосновати каждый день на Його слову, жебы тоты радостны Хрістова слова односили ся і на нас. Слава Ісусу Хрісту!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА