«Слово» – Неділя сліпородженого – неділя, 9.00 год.

Днешня неділя є послідньов в тім пасхальнім часі. Называть ся і Неділя сліпородженого. Ісус выздоровлює чоловіка сліпого од народжіня. Плювнув на землю, зробив болото, помазав очі і наказав му іти ся омыти в купальні Сілоам. Коли так зробив, вернув ся видячій. Ісус тым чудесным ділом вказує, же є досправды Хрістос, же є досправды Богом. Бо як на початку сотворив чоловіка з пороху землі і дыхнув му дых жывота, так і теперь тыма самыма сотворительскыма руками творить нового чоловіка, перед тым сліпого. Но давать му нелем тілесны очі, а і внутрішні. Открытьом внутрішніх оч душі спознавать свойого Бога і кланять ся му. Так днешнє євангеліє і нас учіть, як важно є мати здоровый внутрішній зрак. Бо сліпота є нелем тілесна, є і сліпота душы. Та засліпленость ся проявлять затверділостьов в рабстві гріха, думаньом лем на себе, на свої выгоды, неохотов помочі іншому, привязаностьов ку земному, но і страхом тото стратити. То вказує і приклад родічів того сліпого. Бояли ся признати ся ку Хрістови зо страху перед Жыдами. Но хто мать здоровы внутрішні очі, тот видить, што є хосенне, што є основне про його жывот. А тото познаня освободжує од страху зо страты меншецінного. Просьме нашого Спасителя, жебы і нам отворяв очі нашой душы, жебы сьме виділи, што є на хосен нашому спасіню, і без страху свідчіли тому світу правду о Хрістови, о воскресіню, о вічнім жывоті, як і тот сліпый з днешнього євангелія. Хрістос воскрес!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Чудо вылічіня сліпых Хрістом, Ел Ґреко, 1570. Wikipedia