«Слово» – Неділя самаріянкы – неділя, 9.00 год.

Днешня неділя называть ся Неділя самаріянкы. Ісус приходить до Самарії, є страпленый по дорозі, і сів собі ку студні, є час полудня. В тім часі там приходить жена черьпати воду. Ісус ся ку ній озвав, просячі од ньой воды.

Она зачудовано одповіла: Як то, же ты Жыд просиш собі воды од мене самаріяньской жены? Бо Жыде ся не сходили зо самаріянами. Але Ісус одповів: Як бы ты знала дар Божый а хто тобі тоты слова говорить, то ты бы його просила, а дав бы ті воду жыву. Она не розуміла, што Ісус говорить, прото одповідать думаючі на земне: Та дай мі такой воды, жебы я уж не была веце затліта, а не мусила ту ходити черьпати.

А Ісус говорить: Ідь а заклич свого мужа а прийдь ту. Но она одповіла: Але я не мам мужа. А Ісус одповів: Правду ты повіла, бо єсь мала пять мужів, а тот не є твоїм мужом. Коли Ісус повів тоты слова, тота жена уж перешла од земного і тілесного ку небесному і духовному. Ісус помаленькы веде тоту жену ку доховным высотам. І она зачінать бісіду о приході Месії, котрый повість вшытко потрібне ку спасіню. А коли Ісус видів, же мать одкрыте сердце на приятя правды, говорить: То Єм я, котрый із тобов бісідує.

Она тогды охабила ведерко і утікала до міста о тім звістовати: Подьте увидіти чоловіка, котрый мі повів вшытко, што я поробила, ці то не є Хрістос? А так із той, котру высушовав гріх і страсть, ся стала оголошателька євангелія у своїм місті.

Ісус адресує тоты слова і нам: Кебы сьме розпознали дар Божый самого Господа Ісуса Хріста, правдивый Істочник, Правдиву студну Божой благодати, а кебы сьме познали, же страсть і гріх высушують душу. Але Ісус жыжый істочник гасить тото паліня страстей і гріха жывов водов свого одпущіня, познаня іспасіня каждому, хто приходить ку Ньому зо щіростьов як тота самаріянка жена. Хрістос воскрес!

В неділю, 14. мая 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 14. мая 2023 р. о 12.00 год. і 15. мая 2023 р. о 2.00 год. за русиньскым часом.