«Слово» – Неділя самаріянкы – неділя, 9.00 год.

Далшов недільов Пасхалного часу є Неділя самаріянкы. Мать назву од того, же Ісус переходячі Самарійов, страпленый по дорозі заставив ся при студні поблизку міста Сіхарь. Там ся находила Яковова студня.

По куртім часі пришла жена черьпати воду. Ісус ся ку ній озвав: Дай ся мі напити. Она зачудована, же Ісус Жыд просить од самаріяньской жены пити воды. Но Ісус помаленькы выводить тоту жену од земного розуміня ку доховному, од тіла ку душі. Говорить о жывій воді, з котрой никого уж не буде тлоїти. А коли жена захотіла такой воды, говорить їй, жебы привела і свого мужа. Но она говорить як человіку: не мам мужа. А Ісус одкрывать тайны сердця, говорить: Гей, правду єсь повіла, мала єсь пять мужів а теперішній не є твоїм мужом.

Ісус одкрывать тайну їй сердця, она ся не образила, але в покорі признавать, а помаленькы зачінать бісіду о приході Месії. А коли їй сердце є очіщене, втогды Ісус ся їй одкрывать: То єм я. А она напивши ся воды одпущіня і познаня, втікать а звістує в місті: Подьте посмотрити на чоловіка, котрый мі повів вшытко, што єм поробила. Та ці то не Хрістос? А народ іде ку Хрістови а Він зоставать меджі нима два дні. А іщі веце увірило, же Ісус є Спаситель уж не лем Жыдів, але Спаситель світа.

Так видиме, же напаред требало зваляти мур розділіня. Мур розділіня меджі тов женов і Богом. Жыла грішным жывотом, коли спознала Хріста, жывот ся їй змінив. Од того першого муру так можеме перейти ку другому: ку родині, ку сусідам, ку парохії, місту ці аж по цілый народ, ці іншы народы.

Ісус хоче подати тоту жыву воду каждому, хто просить. Є то вода одпущіня, познаня, мудрости. На то є потрібне із нашой стороны – одкрыти своє сердце. Спознаня і признаня своой грішности. Втогды і мы зажыєме то, што зажыла тота самаріянка. Хрістос воскрес!

В неділю, 22. мая 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. мая о 12.00 год. і 23. мая о 2.00 год. за русиньскым часом.