«Слово» – Неділя перед Рождеством – неділя, 9.00 год.

В Євангелію днешньой неділі, котра ся зве і Неділя святых отців або Неділя перед Рождеством, сьме чули о довгім списку імен, почінаючі од Авраама аж по Рождество Ісуса Хріста. Чом нам Церьков давать чітати тоты імена, яке значіня тото мать про нас?

Кідь ся позаставиме над тым родословом, можеме із того зачерьпнути много хосну про наш жывот. Список зачінать: Книга поколінь або книга народжіня Ісуса Хріста. Євангелиста додав нелем Ісуса, но і Хріста. Бо в Старім завіті быв і іншый Ісус, сын Навіна, котрый намісто Мойсея вовів выбраный народ до обіцяной землі. Тым є передзображіньом Ісуса Хріста, котрый воваджать новый выбраний народ тых, што Йому увірять, по цілу історію Нового завіту, уж не обіцяной землі Старого завіту, но до вічного блаженства в небі. Наперед чуєме Сына Давідового потім Авраамового. Тадь Давід жыв по Авраамови. Но обіцянкы были даны обидвом, а на устах Жыдів было частіше імя Давіда, і то головно в одношіню ку приходу Спасителя. І в Євангліях часто самого Ісуса называли „Сыну Давідів“. Аж потім говорить о Авраамови і його сынах. Розділюєме тот список на три часткы або періоды. Перша од Авраама по Давіда – доба судців. Друга од Давіда по Вавілоньске рабство – доба царів, і третя од Вавілоньского рабства по Хріста – доба первосвящеників. Тым є передзображено, же Спаситель буде в собі зъєдиняти вшыткы три – судця, царь і первосвященик. В тім списку тыж находиме і штири жены, што не было звычайом у Жыдів. Родословы ся вели лем по мужскій лінії. Но Ісус приходить венрути достоїнство і женам, котры не мали в Старім завіті великого значіня. Жыде ся і молили кажде рано міджі іншым: Дякую, же єсь ня не сотворив женов. Міджі тыма женами суть і блудніця, чуджоложніця, чуджінка. Жебы із єдного боку указати, жебы не хвалити ся аж так своїма предками, їх справедливостьов, ани не ганьбити ся за гріхы предків, але смотрити на свої властны. Ісус ся зачіслює до людьского роду. Він, Царь неба і землі, ставє ся чоловіком про нас, про наше спасіня, жебы поздвигнути чоловіка із бессловесія, до котрого упав, послухаючі раду злого. Приходить про каждого чоловіка, без розділу, де жыє, із якого народа. Жебы каждому, хто увірить отворити двері спасіня.

Приймийме Спасителя до нашых сердець в тім надходячім Рождественьскім часі і дозвольме му і нас дотулити ся Його любвов, Його покойом Його одпущіньом. Слава Ісусу Хрісту!

В неділю, 31. децембра 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 31. децембра о 15.00, 20.00 год. і 1. януара o 2.00 год. за русиньскым часом.

Фото: Ел Ґреко – Благовіщеніє. Жрідло: Wikipedia.