«Слово» – Неділя мытаря і фарізея – неділя, 9.00 год.

Неділя мытаря і фарізея нам указує двох людей, котры пришли до церькви ся помолити. Фарізей і мытарь. Фарізей приступує допереду і сміло ся в собі молить. Боже дякую, же я не як іншы люде: несправедливы… або і тамтот мытарь взаду.

Далше говорить о пості двараз до тыждня і десятинах, котры давать. Він пришов не ся помолити але похвалити ся перед Богом. Його пыха йому не дозволює мати хосен із молитвы.

Мытарь стояв цалком взаду. Він говорив Богу: Будь милостивый мі грішному. Ісус говорить, же тот одышов оправданый. Пришов в покорі. Быв свідомый своїх гріхів. Кладе їх перед Господа і одходить наповненый. Пришов наповненый гріхами, зложыв їх перед Бога, і одходить наповненый Божым покойом, одпущіньом.

Фарізей пришов повный, як собі думав, добрых діл, і заслуг, а одходить порожній од Божого покоя і одпущіня, але повный пыхы. Ісус нам кладе тых двох людей із котрых можеме брати хосен і мы. Од фарізея ся учме добрым ділам, котры він робив, але уникайме його пыхы і выхвальованю. Говорьме з апостолом Павлом: Не я, але Божа благодать у мі.

І памятайме на Ісусвы слова: Кедь зробите, што мали сьте зробити – сьме рабами без хосну. А од мытаря учме ся уникати ділам несправедливости а наслідовати приклад його покаяня. Боже, будь милостивый мі грішному. Слава Ісусу Хрісту!

В неділю, 13. фебруара 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 13. фебруара о 12.00 год. і 14. фебруара о 2.00 год. за русиньскым часом.