«Слово» – Неділя мытаря і фарізея – неділя, 9.00 год.

Днешня неділя ся называть Недільов мытаря і фарізея. І то подля образного прикладу в днешнім Євангелію. Ісус ту говорить о двох людях, котры вошли до церькви, жебы ся помолити. Єден із них быв фарізей, другый мытарь.

Фарізей стоячі в переді так в думках ся молить: Боже дякую Ті. Добрі зачінать, бо і наша молитва має зачінати не прошіньом, но прославов Бога, дякованьом. Но потім переходить на слова: же я не такый як іншы люде. Переходить ку погорджаню іншыма, їх одсуджованю. Не говорить, же за помочі Божой благодати не є ани злодійом, несправедливым або чуджоложником. Він лем приходить конштатовати перед Богом, якый він добрый, і што вшытко робить про Бога: постить ся двараз в тыждень, дає десятины, із того, што надобуде. Митарь зясь стоячі цалком взаду не осмілює ся ани підняти ку небу, но піднимать своє сердце. Просить о помилованя за свої гріхы. Видить їх перед собов. Боже будь милостивый мі грішному. І Ісус говорить, же тот мытарь одышов до свого дому оправданый, то є очіщеный, а не фарізей. Бо хто ся выношать, буде пониженый, а хто ся понижує, тот буде підвышеный.

Тот образный приклад є адресованый і ку нам. Учіть нас брати хосен од мытаря і фарізея. Ісус не хвалить мытаря за його жывот, за його діла несправедливости, котрых ся допущав. Но хвалить його пониженость, його покору перед Богом і перед людьми. Стояв цалком взаду. І таксамо Ісус не одсуджує фарізея за його діла, же выповняв тото, што приписовав закон. Але ганить його фалшивость. Робив тоты діла перед людьми лем наоко. Выповняв букву, но не духа закона.

І так наслідуйме фарізея в його добрых ділах без фалшивости і мытаря в його покорі без наслідованя його грішных діл. Тото є посолство днешного євангелія, днешньой неділі, котра є приготовлюючов нас на вступ до Великого посту. Слава Ісусу Хрісту!

В неділю, 28. януара 2018 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28. януара о 15.00, 20.00 год. і 29. януара o 2.00 год. за русиньскым часом.

Фото: Притча о мытарьови і фарозейови. Жрідло: Wikipedia.