«Слово» – Неділя мытаря і фарісея – неділя, 9.00 год.

Першов недільов, котра нас приготовлять на вступ до Великого посту, є Неділа мытаря і фарісея. Ісус говорить пиклад о двох людях, котры вошли до церькви помолити ся.

Єден быв фарісей і другый мытарь. Фарісей стояв в переді і сам в собі так ся молив: Боже, дякую ті, же я не як другы люде. Зачінать добрі свою молитву. Дякує Богу, но потім переходить до выношаня себе перед іншыма а одсуджованя іншых. Собі приписує заслугы, же він іншый од одругых людей. А наконець одсуджує і мытаря, котрый вєдно із ним вошов до церькви. Выхвалять самого себе, што він вшытко робить про Бога. Постить, давать десятины. Другый чоловік, котрый вошов на молитву, быв мытарь. Він стояв в заду, не осмілив ся ани очі підняти ку ньому. Він быв свідомый свойой грішности, своїх планых діл, котры він зробив. А просить лем о єдно: Боже, будь милостивый мі грішному. А Ісус говорить, же тот одышов оправданый із церькви, а не фарісей. Што мав тот мытарь, а не мав фарісей? Ісус не одсуджує фарісея за дотримованя закона, за піст, за десятину. Ани Він не хвалить мытаря за його діла. Но выставлять причіну, чом быв оправданый мытарь: Бо мав духа покоры. Він сі усвідомльовав свою грішность а щіро просив о одпущіня. Св. Василій говорить, же така молитва все є выслухана. Фарісей справды не молив ся, но хвалив перед Богом самого себе. Мытарь мав сокрушене (зламане) сердце. То є, не мав высокы думкы о собі.

Тому нас хоче научіти днешня неділя. Мати зломене сердце – то є ламати высоту думок, понижыти ся перед Богом. Усвідомити, же без Бога нич не зможеме. Втогды буде і о нас платити слово: Хто понижує ся, буде підвышеный. Слава Ісусу Хрісту!

В неділю,  17. фебруара 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 17. фебруара 15.00 і 20.00 год. і 18. фебруара о 2.00, год. за русиньскым часом.

фото: Мыто

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА