«Слово» – Неділя мясопустна – неділя, 9.00 год.

Третя неділя, котра нас приготовлять на вступ до Святого посту, є Неділя мясопустна або тыж Неділя Страшного суду. Зове ся мясопустна, бо тов недільов ся пущало, то є переставало їсти мясо.

А Недільов Страшного суду од днешнього слова Євангелія, де Ісус говорить о своїм другім приході. Тот приход уж не буде як маленькой дітины, котра мусить на руках Марії утікати до Еґіпта перед злобным убивственным Іродом. Но буде то приход у великій силі і славі.

Прийде окруженый святыма ангелами і засяде на престол свойой славы. І зберуть ся вшыткы народы, котры воскреснуть із мертвых. І єдночасно будуть розділены або на праву або на ліву сторону. Каждый буде ангелами заділеный подля своїх діл на землі.

Потім Царь повість любым і ніжным голосом повным солодкости ку своїм выбраным на правій стороні: Подьте, мої любы, і будьте наслідниками мойого Царьства, котре є про вас приготовлне. А додав: я быв в різных потребах: голоден, затлітый, подорожній, нагый… а вы сьте мі послужыли. Коли они йому повідять, а де а коли, наш найдорогшый Спасителю, Він ласкаво одповість, правду вам повідам, коли вы так зробили своїм ближнім, моїм братам, то вы зробили мі самому.

Но оберне ся і ку тым на лівій стороні, но про них будуть його слова як голос грому: Ідьте од мене прокляты до огня вічного, приготовленого діаволу і його ангелам. І додав, бо вы сьте мі не послужыли. А коли і они будуть глядати выгварькы і оправданя, тогды їм повість: тото, што вы не зробили своїм ближнім, ани мі сьте не зробили. Вы сьте любили лем себе, ваше еґо было божеством, котрому сьте ся кланяли. Не смотрили сьте на любов ку ближнім ани ку Богу. Любили лем себе. Повинили сьте пожадливости вашого переводителя діавола, ку котрому теперь ідьте а з ним перебывайте. Бо не про вас было тото приготовлене. Вы сьте мали такы самы принагоды як і тамты на право, но сьте їх не выхосновали.

Тоты слова видять ся нам днесь як тверды і страшны. Но Ісус їх зато говорить наперед, іщі коли сьме на землі. Бо ту маме можность той зміны. Перейти із лівой на праву сторону. Зато ту нам говорить із любви, жебы сьме ту робили покаяня, метанію. Змінили своє думаня наш постой ку нашым ближнім. Жебы ту сьме жыли в любви ку Богу і ближньому.

Жебы сьме там не учули, ідьте од мене, але жебы сьме з Його выбраныма учули, подьте благословены, блажены а будьте наслідниками мойого Царьства на вічны вікы. Слава Ісусу Хрісту!

В неділю, 10. марца 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 10. марца 2024 р. о 12.00 год. і 11. марца 2024 р. о 2.00 год. за русиньскым часом.