«Слово» – Неділя мясопустна – неділя, 9.00 год.

Днешня третя неділя перед вступом до Великого поста называть ся Недільов мясопустнов або тыж нНедільов страшного суду. Євенгеліє нам говорить о другім приході Хріста на землю.

Но о приході не як маленькой дітины, котра мусить утікати перед злобов Ірода, але приході як великого і славного Царя зо вшыткыма ангелами і святыма, жебы каждому оддати подля його діл. Приході на дефінітівный суд, по рішіню котрого уж не мож робити зміну. Є то рішіня на цілу вічность.

Крітерійом того суду буде любов ку Богу і ближньому. Кедь говорить о двох сторонах розділіня людей направо і наліво. Тых, што направо, позве до свого Царьства за проявлену любов через служіня і милосердя ку ближнім. Тых, што наліво, пошле до вічного проклятя через непослужіня Йому.

Што вы зробили єдному з найменшых, то вы зробили і мі. А тото, што вы не зробили, то вы не зробили і мі. Розповідь о суді ся закінчує словами: І підуть до вічного огня на вічны мукы, а справедливы до вічного жывота.

Днешнє слово не є словом страху, є словом радости, коли послухнеме і будеме жыти подля того крітерія любви. Є тыж словом заохочіня до діл любви і милосердя, покля маме тот час земного жывота. А так приймиме тото напомянутя нашого люблячого Владыкы, жебы і нам міг повісти: Подьте благословлены до мого Царьства, а будьте і вы його наслідниками. Слава Ісусу Хрісту!

В неділю, 7. марца 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. марца о 12.00 год. і 8. марца о 2.00 год. за русиньскым часом.