«Слово» – Неділя Mироносиць – неділя, 9.00 год.

Днешня неділя мироносиць ставить перед нас приклад святых жен, котрым свята Церьков дала тітул мироносіці. Од того, же они не зохабили Господа ани по смерти. Кідьже про куртость часу перед надходячов суботов не мож выконати вшыткы обряды повязаны з похованьом мертвого тіла, они в недільне рано ідуть ку гробу з руками наповненыма миром і слызами, котры ся з ним мішають. Они не знають як можуть наповнити своє наміріня, як одвалять камінь своїма слабыма руками, а што зо сторожов Римлян при гробі. Но наперек тому, їх велика любов і щіре наміріня дати послідню прислугу Ісусови, женуть їх ку гробу. А гроб находять порожній і Ангел їм оголошать радостну новину: Хрістос воскрес! Ісус сам ся їм появлять по дорозі. Они першы мають привилґію увидіти Господа жывого, воскресшого із мертвых. Господь одмінив їх щіру любов, котру мали ку ньому од початку. Там не было фалшывости, злобы, але щіру любов, щіре наміріня, котре перебывало і по Його смерти. Прото їх наповнять Господь радостьов: Радуйте ся, оголошайте тоту радостну новину воскресіня! І мы намагайме ся наслідовати святы жены мироносиці в щірій любви ку Господу і в добрім наміріню, нефалшывости. Зіставайме Йому вірны. Несме і мы дорогоцінне миро нашой любви ку Ньому, маючі го перед очами при вшыткых нашых ділах, словах і думках. Бо Він повів: Я з вами по вшыткы дні… Хрістос воскрес!

В неділю, 30. апріля/квітня 2017 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 30. апріля/квітня о 12.00, 15.00, 20.00 год. і 01. мая о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Жены мироносиці. Жрідло: Wikipedia