«Слово» – Неділя блудного сына – неділя, 9.00 год.

Друга неділя перед вступом до Великого посту ся называть Неділа блудного сына. Од образного прикладу, котрый Ісус говорить о двох братах, з котрых молодшый жадать отця, жебы їм розділив маєток. Є то образ перебываня з Богом, жывот подля Божых заповідей.

Чоловік тогды мать вшытко потрібне, но якбы чув ся під тиском заповідей. Діавол сіє до душы, прягнутя фалшывой слободы. А як тот молодшый сын занедовга взяв вшытко і одышов до далекой країны, і там прогайновав вшытко. Так чоловік, котрый собі думать, же найде щастя без Бога, без Його заповідей. Жыючі собі як хоче. Спочатку чує ту евфорію слободы.

Но в тій країні настав голод. І чоловік без Бога чує голод, хоче ся наповнити, но нич не може Бога замінити. Так тот молодшый сын припросив ся до єдного пана того края, жебы быв пастырьом свинь. А прягнув ся насытити стручками, но ани тоты йому нихто не дав. Так чоловік глядать, як утишити тот голод і находить ся в моці злого. Тогды собі повів тот блудный сын. В домі мойого отця і наємникы мають додасток хліба і стріху над головов. Пришла йому думка на дім отця. Вошов до себе. Перед тым быв якбы мімо себе. І робить рішіня встану і верну ся. Не зістав лем при тім познаню, але робить тото рішіня і вертать ся назад.

Коли приходить грішникови тота спасительна думка, може на дітинство, на тоты радостны хвілі покоя, коли жыв із Богом. А приходить думка верний ся. А важно є зробити тот крок а вернути ся через покаяня. А реакція того отця – позерав каждый день, ці блудный сын не верне ся. Так Бог чекать на навернутя грішника. А як го збачів, утікать оперед ньомо, шмарить ся му на шыю і наказує своїм рабам, принесьте перше облечіня – то є знак приналежности ку родині, перстінь на руку, і сандалы на ногы. Як потверджіня, же є знову його дітинов.

Так Бог і нам вертать тото перше облечіня – приналежность до Божой родины. І анеглы в небі радують ся над навернутьом каждого грішника. Тота неділя указує нам, што значіть перебываня з Богом. Указує на смутну скушеность одлучіня од Бога, і радость з навернутя ку Ньому.

Може і в нашім жывоті сьме зажыли подобну сітуацію а може не подяковали Богу за його милосердя. А може вернули ся ку опереднім гріхам. А може сьме далеко од Нього. Тото слово нас кличе встань а верний ся. Отець тя чекать з великов радостьов і мать приготовлене перше облечіня і радость цілого неба над щірым покаяньом. Слава Іусу Хрісту!

В неділю, 3. марца 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 3. марца 2024 р. о 12.00 год. і 4. марца 2024 р. о 2.00 год. за русиньскым часом.