«Слово» – Неділя блудного сына – неділя, 9.00 год.

Днешня неділя блудного сына нам указує з єдного боку прягнутя чоловіка по слободі. Чоловік хоче быти слободный, не хоче ся ничім обмеджовати. Перебываня в домі отця было про нього обмеджованя його слободы. Прото хотів вольность.

Отець їм розділив маєток. Молодшый сын скоро вшытко забрав і одышов до далекой країны, де роспустным способом жывота вшытко прогайновав. А як ся так стало, настав там голод. Він іде пасти свині, но і тото, што метають свиням, йому нихто не дав. Вступив до себе, подумав, як му было в домі отця і роздумує, як ся вернути. І встане а іде.

А ту є друга чістина той події. Отець, котрый выходить і каждый день очекує свого сына. А кедь ся верне, радостно іде оперед нього, давать принести перше облечіна і облече го, і наказує ся радовати, бо сын быв мертвый і ожыв. Ту видиме з другого боку реакцію отця. Не одсуджує того молодшого сына, з любвов го приїмать.

То є образ Божого милосердя, котре приймать каждого чоловіка. Указує нам, же правдива слобода є лем в Богу. Прото не одходьме з дому Отця про фалшыву слободу. А кедь ся стале, же сьме впали, тогды зробме так як блудный сын – вошов до себе, увидів свій стан, але не оставать на тім. Хоче ся змінити. Приходить а отець сам выходить оперед нього. А чує голос: быв мертвый і ожыв; пропав і нашов ся.

Тот голос зазвучіть і про нас од Отця, кедь прийдеме, вернеме ся назад і пожалуєме за минулый способ жывота, далекый од Бога. Вернеме нам назад перше облечіня – достойность царьскых дітей Небесного Отця. Слава Ісусу Хрісту!

В неділю, 28. фебруара 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28. фебруара о 12.00 год. і 1. марца о 2.00 год. за русиньскым часом.