Днешня неділя є послідньов перед вступом до Святой штиридцятніці, Великого посту. Євангеліє нам якбы давать таку інштрукцію на то, як добрі выхосновати тот час. Самоперше є ту потреба взаємного одпущіня. Кідь одпустиме мы єднакым по природі людям, і нам одпустить Бог нашы провины. А зясь як мы не одпустиме, ани нам не буде одпущено. Далше Ісус говорить, жебы не постити про людей, жебы нас виділи, жебы у них глядати славу, але постити про Бога, у Нього глядати славу і одміну за нашы труды посту. Помаж собі голову – то є своє внутро, душу, свій ум, свою волю, жебы не слухати слова злого, але слова Божого Духа, котры буде ку нам говорити через тот святый час в книгах Бытія, Притчей і пророка Ісаії. Тот час нас веде ку свободі, жебы сьме не были рабами жалудка, тілесности, мамоны. Бо де буде наше богатство, наше сокровище, там буде і наше сердце. Бог нам давать тот час благодати, але зохаблять свободну волю. Хочу зажелати Вам вшыткым благодатне і душехосенне пережытя постного часу. Слава Ісусу Хрісту!
В неділю, 26-го фебруара 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26-го януара о 12.00, 15.00, 20.00 год. і 27-го януара о 2.00 год. за русиньскым часом.
Фото – Сантіаґо де Компостела – (Wikipedia).
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА