«Слово» – Квітна неділя – неділя, 9.00 год.

В пятніцю сьме закончіли Святу штиридсятніцю. Богом даный час благодати. Жебы засмотрити ся на наш жывот, на нашу сушу. Жебы робити покаяна, то є зміну думаня. Жебы очістити своє сердце, і так  хосенно пережыти час страстного тыждня.

Но мдджі Святов. штиридсятніцьов і Страстным тыждньом суть два дні. Лазарьова субота і Квітна неділя. На Лазарьову Суботу нам Церьков припоминать подію воскресіня Лазаря на четвертый день.

Ісус тым воскресіньом указав, же мать владу над жывотом і смертьов. Но указав і на своє воскресіня. На побіду над смертьов, гріхом і діаволом. Але тыж, жебы так потвердити і наше воскресіня, котре настане при Його другім приході. Тота подія притігала велике множество Жыдів, котры хотіли видіти не лем Ісуса, але і Лазаря. А начальникы Ізраіля, намісто того, жебы увірили, установили, же убють і Лазаря. Бо через Нього многы одходили зо сінаґоґы і храму, а обертали ся ку Хрістови.

На Квітну Неділю одбыла ся подія, коли Ісус торжественно входить із Оливной горы до Єрусалима. Прославляный великым множеством народа, не іде як земный царь, но іде як Царь душ, скромно на ослятку. Жебы выповнити слова пророків: Твій Царь, дівко Сіона, приходить сидячі на ослятку. Тота прослава од народа не была прославов земному царьови, але прославов небесному Царьови – побідительови. А даровательови вічного жывота.

Но в тых подіях видиме розділіня на дві стороны: сторону жывота і сторону смерти. На стороні жывота є сам Хрістос і його ученикы, сестры Марта і Марія, і тоты, котры увірили. На стороні смерти суть Юда, фарізеї, архієреї, котры хоць видиіли Його діла, не увірили.

І мы вступуєме теперь до Страстного тыждня. На котрій стороні стоїме мы нашыма ділами а нашым жывотом? Слава Ісусу Хрісту!

В неділю, 28. апріля 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28. апріля 2024 р. о 12.00 год. і 29. апріля 2024 р. о 2.00 год. за русиньскым часом.