«Слово» – Квітна неділя – неділя, 9.00 год.

Ісус Хрістос вступує до Єрусалима спроваджаный великым множеством народа. На праздникы Пасхы сходило ся до Єрусалима много народа.

Кедь дочули ся о воскресіню Лазаря, а то на четвертый день, хотять видіти єднак Лазаря, і самого Хріста. А кедь ся дізнали, же Ісус приходить до Єрусалима із Оливной горы, одвертають ся од храма, старозавітных жертв, а свій погляд напрямують на Оливну гору.

Ісус сходить окрикованый множеством народа, котры його прославляють словами: Благословленый тот, котрый іде в імени Господа. Народ очековав Месію, Ослободителя, Царя. Кедь чують о ділах Хріста, вірять, же він є тым Спасительом, Ослободительом і Царьом Ізраіля. Лемже їх думаня і представы были земны.

Они очековали, же Хрістос войде до Єрусалима, выжене свойов силов Римлянів і установить колишню славу выбраного народа. Но Ісус приходить як Спаситель, Ослободитель і Царь, але не земный. Не приходить на то, жебы царьовав як земный царь, жебы установити політічне царьство. Він приходить, жебы установити Боже Царьство на землі – свою Церьков, приходить ослободити не од земного рабства ці окупації, але од рабства смерти, гріха і діавола.

Наслідуйме і мы приклад того народа – одвертайме ся од того світа, його привязаностей, його гріха, його страстей і роскошей, а свій погляд обертайме ку Хрістови, котрый приходить подати нам слободу, отворити про нас небесне Царьство, збавити нас церьства смерти, гріха і діавола. Слава Ісусу Хрісту!

В неділю, 25. апріля 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 25. апріля о 12.00 год. і 26. апріля о 2.00 год. за русиньскым часом.