«Слово» – Квітна неділя – неділя, 9.00 год.

Днешній день празднуєме Квітну неділю. Ісус Хрістос вступує до Єрусалима із Оливной горы. По великім чудеснім ділі воскресіня Лазаря зышло ся до Віфтанії много людей, жебы видіти Ісуса, але тыж і Лазаря.

Коли Ісус сів на ослятко, ученикы пристерають на дорогу свої плащі, другы ріжуть палмовы голузкы. І за слов Осанна, котрый приходить в імени Господа, допроваджають Ісуса в напрямі ку Єрусалиму.

Ісус так выповнять пророчество пророка Захарії, котрый передповів: Радуй ся дівочко Сіона, твій царь приходить ку тобі сидячі на ослятку. Ісус приходить царьовати. Царьовати через терпіня і воскресіня. А не способом, якый може очековав народ. Ісус не приходить як земны царьове на коню, в силі. Він приходить кротко. Він хоче, жебы сьме му дозволили быти царьом над нашыма душами. Він решпектує нашу слободну волю. Він дуркать на двері нашого сердця, але не насилу. Отворити можеме лем звонка.

Дозвольме Господу, жебы быв Царьом в нашій душі. Но то тыж значіть прияти вшыткы условії – робити тото, што нам Він наказує. І втогды частка з народа прияла Його царьства, далшы ставили ся проти. І тоты, котры теперь кличуть Йому Осанна, о пару днів будуть кричати – на крест, бо ся не наповнили їх предсатвы о Його Царьстві.

І од нас є потрібне рішіня – Осанна, зо вшыткыма условіями, або роспний. А то в каждій сітуації нашого жывота. Слава Ісусу Хрісту!

В неділю, 12. апріля 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 12. апріля о 12.00 год. і 13. апріля о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА