«Слово» – Друга неділя по Сошествії Святого Духа – неділя, 9.00 год.

Як быв Йоан Креститель увязененый Іродом, Ісус Хрістос приходить із Юдеї до Ґалілеї. Кедь переходить коло Ґалілейского моря увидів двох братів Сімона, названого Петром і його брата Андрія, як спущають сіті до моря, бо были рыбарі. Кличе їх: Подьте за мнов а я вас зроблю рыбарями людей.

Они такой зохабили свої сіті а ішли за ним. Кедь Ісус ішов далше, увидів другых двох братів, Йоана і Якова, як вєдно зо своїм отцьом Зеведейом справляли сіті. І їх закликав: Подьте за мнов. А они так само зохабили не лем сіті, але і свого отця, а ішли за ним. Як днешнє євангеліє може мати одношіня ку нашому жывоту? Може односити ся лем ку апостолам, а тыж ку покликаню священиків, монахів ці монахынь, но што може повісти звычайному чоловіку? Тадь не каждый є покликаный за апостола, монаха ці монахыню, жебы радікално опустити вшытко і іти за Хрістом. Но днешнє слово ся не односить лем ку духовным покликаням. Односить ся ку каждому хрістіанови. Слова – подьте за мнов – платять про нас вшыткых. Значать вмерати старому чоловіку, вмераня властной волі. Жебы Бога ставити на перше місце у своїм жывоті. Жебы глядати не свою, но Божу волю і Божу славу. Жебы одзеркадльовати жывот Хріста на нашім жывоті. А то на каждім місці, де ся находиме, де нас Боже Провидіня поставило. Ці в роботі, ці в родині. Жебы там свідчіти о Хрістови. Так як нас то учіть і Йоан Креститель: Він мусить рости а я маліти. Або тыж апостол Павел: Уж не жыю я, але у мі жыє Хрістос. Слава Ісусу Хісту!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА