«Слово» – Четверта постна неділя, Праздник Благовіщенія Пресв. Богородіці – неділя, 9.00 год

На нашій дорозі ку Пасхі сме дішли ку Четвртій постній неділі. На тот день припадать і Праздник Благовіщенія Пресвятій Богородіці. Євангеліє праздника нам описує приход Архангела Гавріїла до Назарета ку Діві Марї в домі Йосифа за котрого была зрукована.

Ангел їй поздравкав: Радуй ся, обрадованая, Господь із тобов. Она ся острашыла і роздумовала, што значіть тото слово. Ангел упокоює їй душу: Не бій ся, ты нашла благодать у Бога, почнеш і породиш Сына, даш Йому імя Ісус, він ослободить народ із його гріхів. Кедь Марія говорить о тім, же як ся тото стане, ангел їй одповів, же она почне зо Святого Духа. На што Она одповіла: Я раба Господня, най буде подля твойгого слова.

На вечурні праздинка ся чітать парамія о Мойсейови, кедь увидів кряк, котрый горив а не згоряв. Кедь пришов ближе, чує од Бога покликаня ку місії ослободити выбраный народ. Подобно Ной, о о котрім сьме чітали теперь в постнім часі на вечурні або Літурґії опередпосвяченых дарів, дістав посланя збудовати корабель ківот, в котрім ся сохранить сам і дасть можность нового зачатку про людьство. І Ной і Мойсей приїмають слово Боже, через сохраніня і переведеня до жывота приношають плод про себе і другых. Так ставають передобразом Марії, котра прияла Слово і принесла плод спасія цілому людьству – Месію, Хріста Спасителя. Праві через своє рішіня: Я раба Господня, най буде мі подля твойого слова.

Днешній празник і нас кличе, жебы прияти до лона нашой душы Боже слово через слова Марії: Я раба Господня, най діє ся твоя воля. Жебы через приятя, сохраніня в собі того слова, принести плод послухняности Божому слову на хосен про себе і про хосен другых, котрым можеме вказати дорогу ку Хрістови. Слава ІСХС!

В неділю,  7. апріля 2019 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 7. апріля 15.00 і 20.00 год. і 8. апріля о 2.00, год. за русиньскым часом.

фото – Благовіщеніє Пресвятій Богородіці, Леонардо да Вінчі, wikipedia