«Слово» – Четверта постна неділя – неділя, 9.00 год.

Крестопоклонным тыждньом і днешньов Четвертов постнов недільов сьме вступили до другой половины святой 40-тніці, котра нас приготовлять на Праздник праздників – Пасху. В днешнім євангелію чітаме, як Ісус сходячі із горы Тавор, де ся переобразив перед своїма учениками, стрітив ся із чоловіком, котрого сына мукарив нечістый дух.

Тот отець тыж тяжко терпів через тото. Говорить Ісусови, же привів го ученикам, но не міг ся помочі од них. Было там велике множество народа. Ісус говорить: О невірне і роспусне поколіня, доколи іщі буду з вами, доколи вас мам терпіти? Приведьте го ку мі. Кідь хлопця привели, злый дух ним зачав нарабляти, пав на землю, робила ся му піна. Ісус ся звідує, одколи ся тото діє, і отець одповідать од дітинства а додає: Кідь можеш помож нам. Тот отець смотрив на Ісуса, як і на учеників, думав сі, же кідь они не змогли помочі, ани він то не буде мочі зробити. Отець іщі говорить, же кідь прийде нов місяця, його дітина зазнавать тяжкы мукы.

Злый дух ся крыє за Боже сотворіня, жебы украсти в людях віру в Бога, одвести од Бога, а утвердити іншу віру: а то, же місяць є на причіні того терпіня, місяць, котрый є Божым сотворіньом, і так переносить вину на Бога, як на Причінителя зла. Прото Ісус реаґує: невірне і роспусне поколіня. Якбы повів: Я Вас пришов ослободити од злого, а вы і по такім свідчіню моїх слов і діл, іщі все зістаєте в ідолослужіню? Все вірите веце злому, як свойому Богу? Ісус указуючі свою владу над нечістыма духами говорить: Тобі наказую, выйдь із нього і веце до нього не входь!

Ісус не лем выганять злого, але тыж наказує не вертати ся назад. Тым і нам указує, як важно є памятати собі тоты слова. Кідь мы сповідаме ся із нашых гріхів, кідь злый одходить, кідь Божа любов, Боже приятельство заплавує наше сердце, жебы не отвіряти двері злому, котрый пробує знову заняти місце у нашім внутрі. Но не мать на то права, але пробує із вонкы своїм предложіньом страстных думок, наваджаньом на гріх, ці припамятаньом минувшых гріхів, старать ся ослабити в нас порушаня ку Богу, ку вічности, а знову зробити з нас рабами земного, рабами гріха. Кідь послухаме, втогды злый дух знову забере місце в нашім внутрі.

Наконець Ісус подає нам средство лічіня. Бо кідь были самы, ученикы ся звідують: Чом мы тото не могли зробити? Тадь ученикы дістали міць выганяти злых духів, кідь їх Ісус посылав, но теперь тото не діяло. Ісус говорить о причіні – недостатку віры: Про вашу малу віру. Віра має піддержку через два стовпы: молитву і піст. Правдива молитва, нелем через рушаня нашыма ґамбами, але выходяча із внутра, і правдивый піст, котрый не буде лем вонкашнім, жебы ся указати перед людми, фарізейскым, але справды тілесным і духовным, суть средства, котры роблять твердов нашу віру. Они потім не доволюють злому, жебы знову забрав місце в нашім сердці, котре належыть Богу.

Выхоснуйме тоты средства, котры нам Ісус нукать в днешнім слові, жебы ся приготовити нелем на тоту земну Пасху, котру празднуєме каждого року, але і тоту небесну, котра буде у вічности тырвати вічно. Слава Ісусу Хрісту!

В неділю, 18. марца 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 18. марца о 15.00, 20.00 год. і 19. марца о 2.00, год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Преображеніє. Жрідло: Wikipedia.