«Слово» – 9-та неділя по Сошетствії Святого Духа – неділя, 9.00 год.

В тых днях сьме праздновали память святого пророка Ілії. Походив із роду Арона, жыв в часі Ізраільского царя Ахава, котрый через свою жену Єзавел зо Сідону запровадив в Ізраільскім царьстві култ бога Ваала. Пророк Ілія видячі як выбраный народ проподать ся глубше і глубше до пропасти ідолопоклонства, наперед хотів напомянутьом навернути царя, но він зістав затверділым, потім через сухоту, што была через молитву Ілії хотів опамятати царя, наконець скликує народ на гору Карміль, де дав поскликовати і жреців і пророків ідола Ваала. Дав поставити два жертвеникы, но наказав не запальовати жертву. Пророкы Ваала намагали ся цілый день, до одповіді не было жадной. Ілія помолив ся і Господь зослав огень із неба, спалив жертву. Так вказав поблудженому народу, же Господь є правдивым Богом Ізраіля. За свою дівственну чістоту тіла і душі, ревность за Божу славу і вірность Господу, быв Ілія взятый на огнянім возі до рая. Появив ся трьом апостолам на Горі Тавор при Прображіню Господа, і в часі приходу антіхріста мать прийти пророк Ілія, знову свойов великов ревностьов навертати людей ку вірі в Хріста. Што мoже повісти нам людям XXI. стoлітя? Вказує приклад віры і вірности Богу в часі, коли то не просто, і тяжко. І мы жыєме подобны часы. І мы сьме поставлены перед выбор: кланяти ся Ваалови нашых часів, котрый намагать ся одвернути од віры в Хріста через аморалность, привязаность ку земному, славу, богатство, і так убити в душах жыву віру в Хріста; або остати вірны Хрістови і його Євангелію, і кідь то зо собов несе высміваня, пронаслідованя ці може і мученицьку смерть. Просьме прото того великого ревнителя за Божу славу, жебы нам выпрошав у Господа благодати зістати вірны Хрістови і Його слову в каждій сітуації. Слава Ісусу Хрісту!

Фото: Фреска з выображіньом пророка Ілії в Рілскім монастырю. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА