«Слово» – 9-та неділя по Сошествії Святого Духа – неділя, 9.00 год.

По чудеснім розмножіню хлібів, Ісус попогнав своїх учеників спередити го на другый берег. Ісус потім іде на гору, жебы ся молив. Ученикы суть в тім часі уж в середині моря і про силный вітор ся тяжко намагають.

Ісус видячі тото вшытко своїм Духом, іде оперед них по воді. Ученикы іщі дашто таке не виділи. Думають собі, же видять даяке привиджіня, або може і сам злый дух, накілько Ісуса там не є, може їх зничіти. Они зо страху закричали. Но Ісус заспокоює їх сердця: То єм я, не бійте ся. Най запанує покій у вашых сердцях. Но Петро хоче доказ, і говорить: Дай мі прийти ку тобі по воді. А Ісус доволює. Петро выступив із лодькы і ішов по воді. Но про силный вітор побояв ся і запохыбовав. і зачав ся топити. Закричав прото на Ісуса, а він йому такой подав свою руку і додав: Маловірный, чом єсь ся заколысав? Ґреческкый текст говорить: Чом єсь быв роздвоєной мысли?

З єдного боку звучіть слово Хріста подь, а з другого волны і вітор якбы своїм гукотом говорили: Ты ходиш по воді? Таке предці не може быти. Тото є тым посолством днешнього слова і про нас: Боже слово нам говорить о тім, як маме жыти, як хосновати предметы того світа, як ставляти ся ку світьскій славі, моці, поставліню. А світ нам говорить: То не так, послухай нас. Говорить о ужываню теперь, о нестриманости, роскоши, гляданю славы у людей.

Петро, покы слухав голос Хріста, тримав ся над водов. Як заслухав ся до іншого голосу, зачав ся топити. Памятайме на тото слово і мы. А старайме ся слухати лем голос Хріста, жебы тримати ся над водов в бурках того світа, і дійти ку Хрістови до вічного приставу неба. Слава Ісусу Хрісту!

В неділю, 9. авґуста 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. авґуста о 12.00 год. і 10. авґуста о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА