«Слово» – 8-ма неділя по Сошетствії Святого Духа – неділя, 9.00 год.

Днешнє евангеліє описує чудесне розмножіня хлібів на пустыні. Ісус бере своїх учеників, жебы дати їм оддыхнути, кідь ся вернули зо свойой першой місії. Но народ спередить їх, і як Ісус выходить із кораблика, народ уж го чекав. Він їх не післав гет, но выздравлять їх хворых і потім учіть їх аж до вечера. Тогды ученикы го просять пустити народ, жебы собі люди купили штось їсти. Но Ісус одповідать: Вы їм дайте їсти. Кідь ученикы виділи таке множество людей (пять тісяч мужів окрім жен і дітей) говорять: Маме лем пять хлібів і дві рыбы. Но Ісус пожадує од них принести, што мають. Они послухли і были свідками великого чуда розмножіня хлібів. Ісус їм дав наперед чувствовати свою бессилность і так вказує свою божественну силу. Тото слово і про нас є хосенне. Вказує нам, же Ісус мать владу над вшыткым, з ним не мусиме ничого бояти ся. Він і нам говорить: Дай тото мало, што маш, я то помножу на хосен другых і на твій властный. Послухнийме Господа так, як то зробили ученикы знаючі, же коли даєме Господу, не тратиме, но одосыламе наперед до неба, а і ту на землі, через Боже благословіня, зазнаме чудо розмножіня. Слава Ісусу Хрісту!

Фото: Накормліня множества народа, Александер Іванов. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА