«Слово» – 8-ма неділя по Сошествії Святого Духа – неділя, 9.00 год.

По увязніню і мученицькій смерти св. Йоана Крестителя Ісус бере своїх учеників і ідуть на пусте місце. Но народ їх спередить. Ісус посановав їх, довго їх учів через день. Євангелисты нам не записали слова, котры Ісус говорив ку народу, але описали нам подію, котра одбыла ся на тім місці.

Коли надышла пізна година, ученикы просять Ісуса, жебы уж розпустив народ, жебы собі стигли іщі дашто купити по селах і містах і тыж найти місце на переночованя. Но Ісус їм повів: Не мусять іти ниґде, вы їм дайте їсти. Ученикы говорять, як маме з того мала, тых пять хлібів і двох рыбок накормити так велике множество народа? Но Ісус їм повів: Принесьте мі їх ту! То мало, што мате, дайте то мі.

Ученикы могли одповісти: Тадь кедь даме тобі, што нам зістане, ани мы ся не наїме, ани народ не буде мати хосен, бо хоць бы лем маленьку частку, ай то ся не уйде каждому. Но ученикы послухли наказаня Господа, дали вшытко. Нич не зохабили про себе. Так як мали старость о народ, коли пришли за Ісусом, так і теперь, коли Ісус говорить, треба послухнути.

А так з великов довіров принесли то маленьке, што мали. Тых пять хлібів і дві рыбкы. А Ісус їм наказав, жебы наказали народу посідати по 50 людей. А коли то было выповнене, Ісус взяв хлібы, поблагословив, ламав і так давав ученикам а ученикы подавали народу. А вышткы їли і ся понаїдали. А Ісус іщі наказав ученикам позберати і окрайці, жебы нич не пропало. А назберали двандцять повных кошів одробин.

Так тота подія указала ученикам, же справды ся оплатить довіряти Хрістови, коли пожадовав одречі ся од вшыткого, нич собі не зохабити, не думати лем на себе а то і в сітуаціях, коли наш людьскый розум говорить: Тото не мать змысел, з того нич добре не буде.

Коли Ісус пожадує од нас тото маленько, што мы маме, не будьме в страху, же зазнаме страту, праві навспак, будеме свідками чудесного діла, так як і апостолы. Коли увірили а зробили, што Ісус од них пожадовав, могли радостно повісти: Не были сьме збаламучены, тоты окрайці кричать і ку нам. Довіряйте Хрістови, принесьме йому тото мало, што маме, а же зістатне, ся постарать сам Ісус. Слава Ісусу Хрісту!

В неділю, 18. авґуста 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 18. авґуста 2024 р. о 12.00 год. і 19. авґуста 2024 р. о 2.00 год. за русиньскым часом.