«Слово» – 5-та неділя Великого посту – неділя, 9.00 год.

Пята постна неділя є єдночасно і послідньов недільов святой Штиридсятніці. На пятніцю уж закончуєме тот благодатный час, котрый нам Господь дав на очіщованя нашой безсмертной душы, на зміну нашого жывота.

Подавав нам якбы тоты лікы про нашу душу, жебы принести духовный хосен. Як тот послідній лік указує нам днешнє слово Євангелія.

Ісус ідучі до Єрусалима, понаглять ся. Тым указує, же то чоловіколюбіє Його, же на мукы, жебы прияти смерть за людей а отворити нам небо і вічне Царьство. Ученикы ідуть за ним зо страхом. А Ісус їм явно говорить о своїх муках, котры Його очекують, але і на третій день воскресіню. А двоми з учеників, в часі, коли Ісус говорить о тяжкых муках і смерти, они думають на перешенство: Давають йому своє прошіня – быти в Його Царьстві по правій і лівій стороні. На што їм одповідать: Не знате што просите.

Говорить їм о крещіню і чаші, но они поготово одповідають: І мы можеме пити твою чашу і прияти твоє крещіня. Што Ісус їм ай говорить, же так і буде. Але быти направо ці наліво, то є про тых, котрым то назначено.

Св. Йоан Златоустый іронічно указує – тадь они собі просили забрати місце двох розбійників на кресті. Бо про Ісуса є крест славов. Но не заоставали в такім праягнутю ани іншы ученикы, бо они мерзили ся на тых двох. Тым і самы указали, же они мають в собі тоту скрыту хвороту, котру Ісус хоче поданьом свого ліку вытиснути з їх ран, їх душї на поверьх. Коли їм говорить, жебы меджі нима не было прягнутя першенства подля взорця владык того світа, але хто хоче быти першый, най буде послідній і вшыткым рабом.

Указує, же Він сам пришов послужыти і дати жывот за многых. Хоць сам є Владыка неба і землі. Так Ісус наперед выявив тоту рану, тоту хвороту в їх душах. А потім подав їм тот лік покоры і пожинести, котрый робить великым в Божім Царьстві.

Так і нам указує, іти на глубины в познаню нашой безсмертной душы, і якбы вытиснути вшытко вонка, жебы нич там не остало. Бо лем правдивім глубинным познаньом і выявліньом вічному Лікарьові, можеме набыти здравя і хосен про нашу безсмертну душу. І тот час буде і про нас дуже хосенный. Слава Ісусу Хрісту!

В неділю, 21. апріля 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 21. апріля 2024 р. о 12.00 год. і 22. апріля 2024 р. о 2.00 год. за русиньскым часом.