«Слово» – 5-та неділя по Сошествії Святого Духа – неділя, 9.00 год.

Днешнє слово о выздравліню двох людей, котры были опанованы демонами, нам указує з єдного боку велику любов Господа Ісуса Хріста, котрый став чоловіком, жебы ослободив чоловіка із рабства діавола, гріха і смерти, але тыж указує і на великый дар, котрый нам Господь подаровав – дар слободной волі.

Ісус приходить до Ґадариньского края. Быв то край поганьскый, люде оддавали честь різным ідолам. А там жыли двоми люде овладнуты демонами. Перед приходом Хріста діавол указовав свою силу, нихто ся не осмілив іти по тій дорозі. Но як Ісус пришов демон реаґує: Што тя до нас, Ісусе, ты ту пришов перед часом нас мучіти?

В чім была тота мука? в послухняности. Діавол од початку створіня бунтує ся – не буду ся кланяти, не буду служыти. Но є лем створіня – а мусить ся підрядити Божій силі. А то є про нього муков. А так просить, жебы міг овладнути хоць лем свині. А Ісус доволив на наше будованя і поучіня. Указує ненависть діавола ку людьскому роду. Указує, же як бы провидіня не сохраняло тых людей, давно бы пропали. Ціле стадо верьглося до моря і потопило ся у воді. Пастырі повтікали а звістовали в місті. А ціле місто вышло оперед нього і просили го , жебы одышов із їх краю. А Ісус насів до лодькы і одышов.

Тоты слова адресованы Хрістови діавол часто нашептавать і нам, што тобі до мене, коли ставиме дашто інше на перше місце – свою роботу, маєток, богатство, родину ці алкогол, роскоші, свою красоту… А коли треба змінити свій жывот, тогды ся в нас озывать: Ідь із мойого краю. Не хочу ся дати обмеджовати Твоїма заповідями. Хочу собі жыти подля свого.

Діавол нашептавать і страх, коли увіриш, прийдеш о вшытко. А так тримать чоловіка на выходженых стежках жывота. А Ісус решпектує тот выбор чоловіка. Але біда душі, котра выберать такый жывот без Бога.

Прото не слухайме, што нам діавол нашептавать, не говорьме слова, што тя до мене, але так як емавзскы ученикы: Господи, зістань із нами. Слава Ісусу Хрісту!

В неділю, 17. юла 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. юла о 12.00 год. і 18. юла о 2.00 год. за русиньскым часом.