«Слово» – 4-та неділя по Сошествії Святого Духа – неділя, 9.00 год.

Днешнє слово Євангелія нам говорить о великій вірі стотника в Капернаумі. Тот стотник пришов за Ісусом зо своїм великым трапліном. Він мав раба, котрый быв хворый і тяжко терпив.

Ісус йому повів: Я прийду і выздравлю го. Но коли стотник чув тоты слова, повів: Господи, я не єм достойный того, жебы ты вошов під мою стріху, но повідж лем слово, а буде здравый. А потім стотник додав: Бо і я чоловік під начальством а мам під собов вояків. Кедь повім єдному ідь, та іде…

Koли Ісус чуж тоты слова, зачудовав ся так великій вірі того стотника. Повів своїм ученикам: Смотьте, ани в Ізраілю єм не нашов таку віру! А стотникови повів: Ідь а най буде так, як єсь увірив. А його слуга в тій годині ся выздравив.

Ісус зачудовав ся над віров тохо стотника, котрый быв поганьскым вояком. А пришов за Ісусом з твердов віров, же Ісус мать міць то зробити. Він увірив в божество Хріста. Увірив, же Ісусови як владыкови вшытко ся повинує. Прото Ісус говорить слова: Ани в Ізраілю…

І його ученикы яку многораз мали слабеньку віру, хоць были свідками тілько чудесных діл. Кілько раз чули слова: Маловірны, де є ваша віра? А жебы ся не указало, же лем на словах тот стотник вірив, Ісус якбы йому повів: А теперь най тота твоя віра буде свідчіньом і на ділі. Так тоды ідь а най буде як ты увірив. А тот слуга в тій годині ся выздравив.

І мы ся называме віруючіма. Тадь, повіме сі, мы предці віриме, же Ісус є Хрістос, Божый Сын, котрый воскрес із мертвых. Він Владыка вшыткого. Но як прийде даяка тяжка сітуація в нашім жывоті, кілько раз тота наша віра уж не є так тверда. Коли видиме, што ся діє коло нас. Як владыкове того світа одвертають ся од Бога, як наказують і одобрують то, што є проти Божых заповідей, проти природы і людьского розума.

Ці не звучать і нам слова адресованы ку ученикам: маловірны? Прото віра того стотника най буде підкріпліньом і про нас, жебы в каждій сітуації довіряти Хрістови, же Він знать о вшыткім, а тым, котры Бога люблять, вшытко служыть на добро! Слава Ісусу Хрісту!

В неділю, 2. юла 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 2. юла 2023 р. о 12.00 год. і 3. юла 2023 р. о 2.00 год. за русиньскым часом.