«Слово» – 30-та неділя по Сошествії Святого Духа – неділя, 9.00 год.

За Ісусом приходить єден богатый чоловік, жебы го покушати. Ісус видить до його седрця. Коли давать вопрос: Што робити, жебы набыти вічный жывот, Ісус йому давать одповідь: Дотримовати заповіді.

Но він одповідать, же так робить од маленька. А Господь одповів: Єдно тобі хыбить, ідь продай, што маш, роздай бідным і будеш мати богатство в небі. Но тот чоловік одышов смутный, бо мав великый маєток. Він пришов покушати, но Хрістовы слова ся го дотулили.

Ісус видів до його седця. Видів іскерку щірости. Прото йому одкрывать, де ся находить його проблема. Указує му, што робити, жебы набыти вічный жывот. Його проблема была, же быв привязаный ку богатству, ку земному. Прото Ісус говорить – одшмарь тото вшытко, а будеш мати правдиве богатство. Але він не хоче, одышов.

Ісус є правда. Веде чоловіка в правді. Указує, де є проблема чоловіка. Ісус і нам говорить: збав ся вшыткого. Але говорить не лем тото неґатівне – зречі ся. Але давать і обіцянку – будеш мати богатство в небі. Но реакція многых людей є подобна тому чоловікови. Мають выходжены стежкы, котрых ся не хотять збавити.

Так і каждому з нас говорить в днешнім слові: одвяж ся од привязаности, і будеш мати богатство в небі. Слава Ісусу Хрісту!

В неділю, 31. януара 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 31. януара о 12.00 год. і 1. фебруара о 2.00 год. за русиньскым часом.