«Слово» – 3-тя неділя по Сошетствії Святого Духа – неділя, 9.00 год.

Ісус Хрістос указуючі приклад ока, хоче указати на око душі. Так, кедь чоловік мать здраве око, видить ясно, кедь мать здраве око душі, видить ясно предметы того світа і одношіня ку ним.

Коли Бог сотворив першого чоловіка і умістив йохо да рая насолоджіня, не мав тогды ниякых старостей. Жыв у великім покою, радости. Не мав пожадливость. Не старав ся о то, што буде їсти, ани о стріху над головов. Но діавол приступує і якбы хоче понукнути алтернативу. Представлять Божы заповіді як дашто невыносне, тяжке, обмеджуюче. А то, што він предкладать, передкладать як дашто приємне, легке.

Першы родічі налетіли а спознали, же суть нагы. Перед тым їх нагота не трапила, бо были облечены до Божой славы. Но коли одвергли Божы заповіді а выбрали раду злого, тогды стратили то небесне облечіня а спознавають свою наготу. Ісус нам предкладать своє слово, свої заповіді, котры не суть обмеджованьом, але тов правдивов слобовов. Но діавол нам нашептавать: Не слухай Бога, Його заповіді тя обмеджують, не дадуть ті дыхати. Теперь інша доба. Я ті понукам слободу, нич не мусиш а єдночасно можеш вшытко.

Можеме видіти як легко ся му то дарить так баламутити людей. Ту на землі обіцять легкый жывот, обіцять слободу, а насправды обіцять рабство ту на землі і вічны мукы у вічности. А Ісус нас позывать прияти Його слово: не старайте ся о їдло, облечіня. Тыма словами нам говорить: не будьте рабами ничохо земного. Ани богатства, ани свойой красоты ці силы. Тадь вшытко є од Господа. Глядайте самоперше Царьство Боже і тото вшытко ся нам додасть. Ісус не говорить: нич не робте, але не старайте ся. Не будьте рабами. Бо тогды легко ужірите злому, але вірьте моїм словам. Я ся старам о небесны птахы, о польовы ростлины, тым скорше о Вас маловірны.

Прото вірьме словам нашого Господа, котрый нам приготовив щасливу вічность а ту на землі нам указує як пережыти радостно, в покою на сердці дні нашого земного жывота, як мати здраве око нашой души а набыти небесне царьство. Слава Ісусу Хрісту!

В неділю, 25. юна 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 25. юна 2023 р. о 12.00 год. і 26. юна 2023 р. о 2.00 год. за русиньскым часом.